Piniartut ilisimatusartullu suleqatigiinnermikkut angusaqarluartut

Piniartut Qeqertarsuarmeersut arfivinnit misissugassanik 1000-it sinnerlugit amerlassusilinnik ukioq manna tigusiffiginnissimapput. Tamannalu malunnartinniarlugu kaffisortitsisoqarsimalluni.

Ilisimatusartartut piniartullu Qeqertarsuarmeersut suleqatigiinnerat Pinngortitaleriffiup oqaluttuarisaanerani suleqatigiinnerit sivisunersaraat, ukioq mannalu arfiviit misissugassanik tigusiffigineqarneri 1000-it sinnerlugit amerlassuseqarlutik.

Tassa Qeqertarsuarmi piniartut suleqatigalugit arfiviit mattaannit misissugassanik tigusisoqartarpoq. Pinngortitaleriffik tusagassiorfinnut nalunaaruteqarluni oqaluttuarpoq.

Angusaqarluarsimaneq malunnartinniarlugu Qeqertarsuarmi piniartut ilisimatusartullu kaffisoqatigiissinneqarsimapput.

Misissugassat ukiumut 50-it tiguneqartartut

Pinngortitaleriffimmit oqaluttuarineqarpoq Qeqertarsuarmi piniartut misissugassanik ukiumut 50-it missaannik tigusisartut. Misissuinerit aqqutigalugit paasineqartarpoq arfiviit Qeqertarsuarmukartartut Qeqertarsuullu Tunuanukartartut suiaassusiat qanorlu ukioqarnersut. Taakkua saniatigut misissuinerit arfiviit qassiunerisa paasisaqarfigineqarnissaanut atorneqartarput, misissukkat siusinnerusukkut misissugaasimasunut sanillersuunneqarsinnaammata.

- Assersuutigalugu paasineqarsimavoq arfiviit Qeqertarsuup Tunualiartartut amerlanersaat tassaasartut arnavissat piaqqiorsinnaalersimasut, angutivissallu immami avasinnerusumi uumasarput imaluunniit Canadap imartaani arferit suli piaqqiorsinnaanngitsut ilagisarlugit, Pinngortitaleriffimmit ilisimatitsissutigineqarpoq.

Paasissutissat pingaarutillit

Piniartut ilisimatusartullu suleqatigiinnerisigut, arfivinnik nungusaataanngitsumik piniartoqarsinnaanerata nalilersorneqartarneranut pingaaruteqarpoq.

Piniartut taamaalillutik nungusaataanngitsumik arfivinniartoqartarnissaanut tapersiisarput. Nunat tamalaat arfanniarnermut ataatsimiitsitaliarsuanni (IWC-mi) nalilersuinerit ingerlanneqartarput, Kalaallillu Nunaanni nungusaataanngitsumik piniartoqarnissaa siunertaralugu pisassat pillugit tassanngaaniit siunnersuisoqartarluni.

Powered by Labrador CMS