Piniartut aqqartartuugunartumik Tasiilap eqqaani takunnissimasut

Piniartut marluk russit aqqartartorigunagaannik nutaaliaalluinnartumik siorna novembarip qaammataani Tasiilap eqqaani takunnissimasut, tusagassiorfik allappoq.

Tasiilami piniartut marluk siorna novembarip qaammataani piniariarsimapput.

Piniartut taakku marluk 15 - 20 kilometerit ingerlaareerlutik, aallaasimik qinngutaatigut aqqartartup napasuliaanik takunnissimapput.

Ekstra Bladet Kalaallit Nunaanni Politiit apersuisimanerannit nalunaarusiamik takunnissimanini tunngvigalugu taamatut allappoq.

Nalunaarusimaut ulloq 12. november ulluliunneqarsimavoq.

Piniartut ernumanartumik takunnereeramik Tasiilamut uterlutik politiinut nalunaaruteqarsimapput.

Ekstra Bladet naapertorlugu, piniartut taakku marluk apersorneqarnerminni, asseq russit aqqartartuannut B-237 Rostock-on-Don-imut assingusoq takusimallugu oqaatigaat.

Ukiuni kingullerni oqartussat Kalaallit Nunaata imartaani susoqarneranik minnerunngitsumillu kissaatigineqanngitsumik naalagaaffiit pissaanillit nunap imartaaniinnersut pillugit ilisimanninngitsututut oqallisigineqartarsimapput.

Naalakkersuisut sapaatip-akunnerani matumani siusinnerusukkut Danmarkimi naalakkersuisut piginnaasanik annertusaaniarnerannut isumaqatigiissut atsiorpaat. Isumaqatigiissut malillugu ilaatigut dronit ungasissumut ingerlasinnaasut marluk nakkutilliissutissat 750 millioner koruuninik nalillit kiisalu qaammataasakkut nakkutilliissutissaq 85 millioner koruuninik nalilik pisiarineqartussaapput.

Powered by Labrador CMS