Piniartunut digitaliusumik aaqissuussineq
Great Greenland A/S-ip pisariillisaanermut atatillugu suliaqarnermini e-Boksillu Kalaallit Nunaanni innuttaasunut tamanut maanna atorneqartussatut innersuussutigineqalermat Great Greenlandip piniartuni amminillu tunisisartuni digitalimik e-Boksikkut attavigisalerlugit aallartippai.
Piniartut assersuutigalugu puisip amianik Great Greenlandimut tunisigaangata, ammeriviup piniartut e-Boksikkut attaveqarfigisalissavai.
- Digitaliusumik aaqqiinikkut ikaarsaarneq tamanna Great Greenland A/S-imut sipaarutaasorujussuullunilu periarfissarpassuaqalersitsissaaq, ammeriviup pisortaa Preben Møller tusagassiutinut nalunaarummi allappoq.
Aallaqqaammut pineqartut tassaassapput ukiumoortumik nalunaarusiat 700-ngajaat e-Boksikkut piniartunut nassiunneqartussat. Taamaattumik e- Boks Great Greenland A/S-imut ”allakkisartartutut” atussaaq, kisiannili aamma toqqorsivittut piniartumut atuutissalluni.
Tamanut aaqqissuussaq pitsaasoq
- Ukioq qaangiutileraangat piniartut namminneerlutik aningaasarsiarisimasaminnik nalunaarsuileraangamik ukiumoortumik nalunaarummik pissarsisimanngitsunik imaluunniit tammaasisunik saaffiginnittorpassuaqartarpoq. E-Boks atorlugu piniartup Great Greenland A/S- imiit allagarsiai naniuminarnerulissapput aammalu ukiumoortumik nalunaarusiaq kingusinnerusukkut atussagaluaraanni e-Boks toqqorsivigiuminassalluni. Soorunami piniartut ilaasa e-Boks-ip atorniarnera ajornakusoortissagunikku paasisinnaakutsoorparput, taamaattumillu ajornartoortoqassagaluarpat eqaatsumik ikiuerusussususeqarluta aaqqiiniaqataajumaarpugut, ammeriviup pisortaa nassuiaavoq.
E- Boksip aamma Great Greenland periarfississavaa piniartunut akinik unamminartunik nalunaaruteqartarnissaq, soorlu piffissami aalajangersimasumi amminik tuniniaaneq unitsinneqarpat imaluunniit puisit amiinik suliaqarnermi periutsinik nutaanik pitsaasunillu peqarpat e-Boksikkut ilisimatitsisoqarsinnaassaaq.
Kalaallit Nunaat tamakkerlugu 2020-imi Great Greenland A/S-ip ammit 23.000-it sinnerlugit piniartunit tunivai aammalu ukiup ingerlanerani piniartut 700-ngajaat aningaasarsitissimallugit. Ukioq 2021 januarip aallartisimalernerani Great Greenland A/S-ip piniartunut aalajaatsunut 1 million koruuninik bonusinik agguaapput aammalu 2021-imi puisit amiinik tunisinermi akit qaffanneqaqqillutik.