Piniartoq silap pissusia pillugu ataatsimeersuarnermut peqataasoq

Piniartup aalisartullu Lars Peter Mølgaardip silap pissusiata allanngoriartorneranit piniarnermut sunniutai pillugit nunarsuarmi aqutsisunut Sharm El Sheikimi, ulluni makkunani ingerlanneqartumi oqaluttuarai.

Lars Peter Mølgaard Kitsissuarsummiuuvoq -lu aqqutigalugu inuusuttut COP27-mut peqataanissaannut ”Indigenous Youth Programme” FN-mit tapiissutit atorlugit Egyptenimut angalavoq. ICC

Silap pissusiata allanngoriartornera pillugu nunarsuarmioqatigiit naalagaaffiillu ataatsimeersuarneranni ICC-p Saamit Siunnersuisoqatigiiffiat peqatigalugu oqallitsitsineranni KNAPK-mit piniartoq aalisartorlu inuusuttoq Lars Peter Mølgaard peqataavoq, tassani silap pissusiata allanngoriartornerata nunatsinni piniarnermut qanoq sunniuteqarneranut isummani saqqummiuppaa.

Issittoq pillugu oqallitsitsinermi silap pissusiata allanngoriartornerata naggueqatigiit Inunnut Saaminullu inuuniarnermut, kulturikkut kinaassutsimullu sunniutai sammineqarput. Inuusuttullu aalisartup Kitsissuarsunneersup tamanna ilisimasaqarfigaa:

- Aalisartutut piniartutullu inuunitsinni silap pissusiata allanngoriartornerata uatsinnut sunniutai saqqummiuppakka, namminerlu aalisartutut piniartutullu misingisakka takusakkalu aallaavingalungit saqqummiussillunga. Aammalu siulinnit ilisimasat uannut ingerlateqqinneqarnikut saqqummiullungit, Lars Peter Mølgaard oqarpoq.

Inuit pisinnaatitaaffiinut sunniuteqarput

Ilisimasallu kinguaariinnit kinguaariinnut ingerlateqqinneqartartut ilanngutissallugit pingaaruteqartoq, Nunani tamalaani ICC-mi siulittaasup, Sara Olsvigip oqaatigaa.

- Silap pissusiata allanngoriartornera kultuuritsinnut, ilisimasatsinnut, inooriaatsitsinnut taamaammallu kinaassutsitsinnut annertuumik sunniuteqarpoq, taamaalillunilu inuttut pisinnaatitaaffitsinnut toqqannartumik kinguneqarluni. Taamaammat ilisimasavut aamma tunngavigineqartariaqarput iliuusissanillu eqqartueqatigiinnerni qanimut naligiissutillu suleqatigineqartariaqarluta, taanna oqarpoq.

ICC-p ukiuni 45-nngortuni nunat tamalaat isumaqatiginninniartarnerinut peqataasarnermigut Inuit ilisimasaannik saqqummiussiffiusarsimasoq arlalitsigullu inernernik sunniuteqartarsimasoq, Sara Olsvigip oqaatigaa.

- Silap pissusiata allanngoriartornera pillugu isumaqatiginninniarnerni naalagaaffiit pissaanillit kisiisa aallaaviginagit, inuiaat allannguutinit sunnernerneqarnerpaat aamma ilisimasaat aallaavigalugit aaqqiissutissanik nassaarniartarnissaat kaammattuutigaarput, Olsvig oqarpoq

Silap pissusiata allanngoriartornera piniariaatsinik allanngortitsisarpoq

Silap pissusiata allanngoriartornerata sikusarnera sunneraa, Lars Peter Mølgaardip aamma oqaatigaa, siornatigumut sanilliullugu taanna allaaneruvoq.

- Ilaatigut piniakkat tikittarlutillu aallartarfiisa nikikkiartornerannik kinguneqarput piniariaatsinillu assigiinngitsunik atorneerullutillu puigorneqalernerannik kinguneqarlutik, piniartoq taama oqarpoq.

Lars Peter Mølgaard Kitsissuarsummiuuvoq ICC-lu aqqutigalugu inuusuttut COP27-mut peqataanissaannut ”Indigenous Youth Programme” FN-mit tapiissutit atorlugit Egyptenimut angalavoq.

COP27 18. novembarip tungaanut ingerlassaaq, taannalu Egyptenimi Sharm el Sheikimit pivoq.

Powered by Labrador CMS