Piniarnermut nalunaarutiginninnerit 1500-t kukkusumik nassiunneqarsimasut

Pisanik nalunaaruteqarneq imminut kiffartuussivimmi naqiterneqanngikkunik Sullissivik.gl kommunip kiffartuussivianut nalunaarutigineqassapput.

Taamatullu piniartunut paasissutissiineq Aalisarnermut Piniarnermullu Naalakkersuisoqarfimmiit (APN) iluatsinneqarsimanngilaq.

Amerlasuummi ukiormoortumik nalunaarsuiffiit pisarnertik malillugu Naalakkersuisoqarfimmut nassiussimavaat.

- Ulloq manna tikillugu APN pisanik nalunaarsuiffinnik 1.530-nik tigusaqarsimavoq, taakkulu kommunimut najugaqarfigisamut utertinneqassapput, naalakkersuisoqarfik tusagassiuutinut nalunaarummi allappoq.

Piniartullu 'pisarneq malillugu' nalunaarutiginnissimasut, nalunaarutiginneqqissapput.

- Pisanik nalunaarsuiffinnik APN-imut nassitseqataasimaguit taava illit nammineq www.sullissivik.gl aqqutigalugu imalunniit sumiiffinni Sullissivimmut saaffiginnillutit pisanik nalunaarsuissaatit, 2018-imullu piniarnermut allagartamik pillutit, naalakkersuisoqarfik nangilluni allappoq.

- 2017-imi februaarip aallaqqaataaniit sunngiffimmi imaluunniit inuussutissarsiutigalugu piniarnermut allagartamik www.sullissivik.gl aqqutigalugu imaluunniit kommunerisanni Sullissivimmut saaffiginninnikkut ingerlaannaq pisinnaanera atuutilernikuuvoq.

Paasissutissanik suli allanik, uani taaneqanngitsunik pissarserusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: APN@nanoq.gl