Piniarnermut ataatsimiititaliaq: Piniartut qularnaatsumik paasitinneqassapput

Tunumi qilalukkanik qernertanik pisasseeqqittoqassanersoq, Aalisarnermut, Piniarnermut Nunalerinermullu Ataatsimiititaliap paaserusuppaa.

Qilalukkanik qernertanik immikkut pisassiisoqassanersoq pillugu, Piniarnermut ataatsimiititaliaq Piniarnermut Naalakkersuisumit ukiup naannginnerani akissutiserusuppoq. Ataatsimiititaliaq tusagassiutinut nalunaaruteqarluni allappoq.

Avannaata kitaani piniartut qilalukkanik qernertanik sapaatip akunnerata siuliani immikkut pisassinneqarput, Tunumilu piniartut qilalukkanik qernertanik immikkut maanna pisassinneqarusulerlutik. Nalliuttut qanilliartortut, taamaattumillu aalisartut piniartullu ataatsimiititaliami ilaasortanut toqqaannartumik saaffiginnittaartut, ataatsimiititaliaq allappoq.

- Aalisartut piniartullu ilarpassui suliffissaqarnikkut allamik decembarip qaammataani isertitaqaatigisinnaasaminnik periarfissaqannginnerat ataatsimiititaliap Naalakkersuisunut eqqaasitsissutigissavaa, ataatsimiititaliami ilaasortat tusagassiutinut nalunaarumminni allapput.

Taamaattumik tunumut immikkut pisasseeqqinnissamik apeqqut piaartumik paasinarsiseqqullugu ataatsimiititaliap Nikkulaat Jeremiassen kaammattorpaa. Tamannalu piaartumik pisariaqarpoq.

Isumaqatiginninniarnermi nukittunerusut

Aalisartut piniartullu ilisimasaannik uppernarsaasersuineq Pinngortitaleriffik suleqatigalugu nukittorsarneqaqqullugu Aalisarnermut, Piniarnermut Nunalerinermullu Ataatsimiititaliap Naalakkersuisut ilanngullugit nukingisaarpai.

Taamaaliornikkummi pisassanik aalajangersaaneq pillugu nunanik allanik nunallu tamalaat kattuffiinik isumaqatiinniarnermi nunarput nukittunerusinnaasoq, ataatsimiititaliaq isumaqarpoq.

Powered by Labrador CMS