Piniarnermut allagartat ajornartorsiutaasut
Piniartut tuttunniarnissamut akuersissutitik pisarisimasanik nalunaarutitalerlugit utertinngikkaagatigit, qanoq pisaqartoqarsimatigineranik aamma sumiiffiit ilaanni tuttut amerlassusaannik naliliiniarneq ajornarsinnaasarpoq. Tamanna maanna kinguneqartinneqartalissaaq, Namminersorlutik Oqartussat ilisimatitsipput.
2019-imi Nuup aqutsiveqarfiani inuussutissarsiutigalugu sunngiffimmilu piniartunut allagartat 3.152-it tunniunneqarsimapput, 442-innaalli pisaqarsimanermik nalunaarutitalerlugit utertinneqarsimallutik.
- Tamanna naammaginanngilluinnarpoq, aamma Aalisarnermut, Piniarnermut Nunalerinermullu Naalakkersuisoqarfiup (APNN) kiisalu Pinngortitaleriffiup (GN) qanoq pisaqartoqartigisimaneranik kiisalu tuttut qanoq amerlatiginerannik nalililiiniarnerat ajornakusoortippaa, Namminersorlutik Oqartussat ukioq manna piniariartarnerit pillugit tusarniaanissamut saqqummiussaat taamatut nipeqarpoq.
Ikioriarfissaqanngitsoq
Inatsisitigut pisussaaffioreerpoq, akuersissutaatini pisarisimasat pisaqarsimannginnerillu nalunaarsussallugit, tassa ukiup tulliani akuersissummik nutaamik pissarsissagaanni. APNN-imi pisortaq Jørgen Isak Olsen naapertorlugu, tamanna siusinnerusukkut iliuuseqarfigineqarsimanngilaq.
- Inuit ukiup siuliani nalunaarsukkaminnik tunniussisimanersut misissorneqarnissaannut maannamut nammattunik sulisussaqartarsimanngilaq, taamaammat akuersissutinik piniartunut itigartitsisarsimanngilagut, taanna Sermitsiaq.AG-mut oqarpoq.
Tamannali maanna iliuuseqarfigineqassaq, naalakkersuisoqarfimmi pisortaq erseqqissaavoq.
-Maanna sukaterissaagut. Akuersissutitit utertinngikkukkit, ukiup tulliani akuersissummik pissarsissanngilatit, Jørgen Isak Olsen oqarpoq.