aavarneq
Pinialuttartunut nutaarsiassatsialak
Arfininngorpat aggustip aallaqqaataani ukioq manna tuttunniarneq aallartissaaq, pinialuttartunullu nuannaarutissaqarpoq
Tuttunniarsinnaanermut akuersissut kommunimut suli aanngiliuk?
Uippakajaarutissaqanngilatit, piffissaqaqaatit. Pinialuttartut ukioq manna tuttunniarusukkunik siornatulli uippakajaartigisariaqanngillat. Nunatsinni pinialuttartorpassuit ukioq manna tuttunnniarsinnaanerat sivitsorneqarpoq, tassa ukioq manna tuttunniarsinnaaneq Naalakkersuisut sapaatit akunnerinik marlunnik sivitsormassuk. Taamaattumik pinialuttartut ukioq manna aggustip aallaqqaataanit oktobarip 15-iannut tuttunniarsinnaapput. Aavarniaruit tuttunniarsinnaanermut akuersissut piffissap aavarfissap naannginnerani aaginnassavat.
Karlsenimit sap. ak. 2-nik sivisunerusumik
2014-imi taamanikkut piniarnermut naalakkersuisoq Finn Karlsen aalajangiivoq piffissami tuttunniarfiusumi sapaatit akunnerini kingullerni marlunni aliikkutaralugu pinialuttartut piniarsinnaassanngitsut. Juulip naalernerani Aalisarnermut, Piniarnermut Nunalerinermullu Naalakkersuisoqartfik nalunaaruteqarpoq ukioq manna, ukiornissaanullu, tuttunniarnermi malittarisassat qanoq ittuussanersut.
Tuttunniarsinnaalernissamut sapaatit akunneri marluinnanngoraluartut inuussutissarsiutigalugu piniartut amerlanerpaartaasa malitarisassat allanngortinnerisigut unammillerneqarnerulaalernissartik isornartoqartinngilaat.
Assigiinngitsumik isumaqarfigaat
Tusarniaanermi Kangaamiuni KAPP Nanortalimmilu NAP isumaqataallutik allapput isumaqarlutik pinialuttartut siusinnerusutulli sapaatit akunnerini qulini tuttunniarsinnaatitaasariaqartut.
Maniitsumili MAPP Nuummilu NAPP akerliliipput.
Nuummi piniartut aalisartullu NAPP-mi ilaasortat pinialuttartunik killileerusunnersaapput, tusarniaanermilu akissumminni allallutik pinialuttartut siunissami ataasiinnarmik tuttussinnaatiatassasut, maannakkutut tuttunniarnermik ingerlatisvimmi ataatsimi tallimaraarsinnaatitaanatik.
Ullumikkut inuussutissarsiutigalugu piniartut 20-nik tuttussinnaatitaapput.
Pinialuttartunit unammillerneqarput
NAPP oqarpoq neqinik tuniniaanermi pinialuttartunit akitigut unammillerneqartarlutik, tamakkua tuttu ataaseq piniartuinnit piniarnermik inuussutissarsiutilinnit, 1.000 koruuninik akikinnerusumik tunisarmassuk.
Inuussutissarsiutigalugu piniartunut, ukioq manna tuniniagassaminnik arsaarneqarsimasunut misigisimasunut saammarsaatissaavoq ukiukkut kisimik tuttunniarsinnaatitaassagamik.
Ukiut ingerlanerini piffissat tuttunniartarfiit arlaleriarlutik sivitsorneqarlutillu sivikillineqartarsimapput.