Pingajoqqat aallaaneqarput

Tassa allaqqunneqarsinnaajunnaarpoq. Nannut pingajoqqat Qeqertarsuatsiaannut qanillattortaqattaartut aallaaneqarput. Nannut nunaqarfimmi najugaqartunut ulorianarsivissimapput.

Nanoq arnaviaq piaraalu marluk Qeqertarsuatsiaannut ataasinngormalli qanillattortaqattaartut, tallimanngornermi ullaap tungaani kommunefogedimit aallaaneqarsimasut, Sermitsiaq.AG-p paasivaa.

Piniarnermut, Aalisarnermut Nunalerinerumullu Naalakkersuisoqarfiup nannut pingajoqqat aallaaneqarnissaat sapaatip akunnerani matumani siullermik akuersissuteqarfigisimanngikkaluarpaa.

Piffissami taama aalajangernermi nannut nunaqarfimmi najugaqartunut uloriananngitsut nalilerneqarsimapput. Politiit kommunefogedilu suleqatigiillutik pingajoqqat nunaqarfimmit qimaatinniarlugit sulissutigisimavaat.

Uteqqittartut

Nunaqarfimmulli uteqqittarmata, aallaaneqarnissaat allaqqunneqarsinnaajunnaarpoq.

- Nannut piliatsinnik unnuap ingerlanerani nerisimapput. Kalaaliaqqami tuttut nerisimavaat, silatitsinnilu piliagut aamma neriffigisimallugit, Anda Nathansen, Qeqertarsuatsiaanni meeqqat atuarfianni pedeliusoq oqaluttuarpoq.

- Atuarfiup pisortaata ullaaq nalunaaqutaq 6.30 missaanni kalerrippaanga nannut nunaqarfitsinniilersimasut pillugit. Tusagaq tupannarpoq, oqarpoq.

Nannullu piaraat qanorluunniit inequnartigigaluarpata, illup silataaniittorissallugit ulorianarpallaarpoq.

- Ajoraluaqaaq aallaaneqartariaqalersimammata. Piniagassat taakku ataqqiuarsimavakka. Maannali nunaqarfitsinni nerereeramik uerisussanngorput uteqqittalissallutillu. Allatut iliorsinnaajunnaarsimavugut, Anda Nathansen oqarpoq.

Ullup ingerlanerani ilisimatitsisoqassaaq

Nannut aallaaneqarsinnaanerat pillugu naalakkersuisoqarfik qanga akuersissuteqarsimanersoq, suliamilu politiit qanoq suleqataasimatiginersut, Sermitsiaq.AG-p paasinngilaa.

Politiit naalakkersuisoqarfimmut, naalakkersuisoqarfimmilu immikkoortortaqarfimmi pisortamut Amalie Jessenimut innersuussipput. Immikkoortortaqarfimmi pisortaq ilisimatitsivoq ullup ingerlanerani tusagassiorfinnut nalunaaruteqarumaarlutik.

Nannunit filmiliat uani takuneqarsinnaapput:

Slået op af Birthe B. Rosing i Fredag den 18. september 2020
Powered by Labrador CMS