Skip to main content

Pingaarnerutitaq: Sarex-imik sungiusarneq iluatsilluarsimavoq

Exerciser Director Karsten Riis Andersen malillugu Tunup avannaani imaani annaassiniarnermik sungiusarneq annertooq naatsorsuutigisatut ingerlasimavoq. Aamma nunat peqataasut naammagisimaarinnipput

– Pingaartumik erseqqissaatigissavara nunat peqataasut, Issittumi Siunnersuisoqatigiinni ilaasortaasut, suleqatigiilluarsimasorujussuummata. Kikkut tamarmik piumassuseqarluarsimapput, inuiaqatigiinnut pitsaanerpaamik.
Taamatut oqarpoq Exercise Director kommandørilu Karsten Riis Andersen, ujaasinermik annaassiniarnermillu sungiusarnermik naammasseqqammersumik ´Sarex Greenland Sea 2013´-imik aqutsisoq.
– Siorna sungiusarnermi qaqqat assersuinerat pissutigalugu attaveqarniarnikkut ajornartorsiortoqarsimavoq. Ukioq manna attaveqarniarneq qanoq ippa?
– Pitsaanerusumik ingerlasimavoq. Attaveqarnermut atortunik misiliivugut, tamakkualu ilaatigut iluaqutaapput. Sulili amigaateqarunarpoq. Aamma pingaaruteqartorujussuuvoq tusagassiorfinnut attaveqartarneq, paasissutissanik sukkasuumik ingerlatitseqqittarniassagatta. Tamanna sungiusarparput Aarhusimi tusagassiortunngorniat nunanit tamalaaneersut oqartussaasunut sianeqattaarlutik, taamaasilluni oqartussaasut maluginiassammassuk tatineqarneq qanoq annertutigisinnaanersoq, Karsten Riis Andersen nassuiaavoq, nunallu peqataasut nersualaaqqillugit tassaasut Kalaallit Nunaat, Danmark, Island, Canada aamma USA.
Atuaruk: "Issittumi SAR-imik upalungaarsimaneq nersualaarpaat"
Atuaruk: "Sarex-imik sungiusarneq imatut aqunneqarpoq"
Nunat peqataasut naammagisimaarinnipput
Tallimanngormat Mestersvigimi naatsumik nalilersuisoqarpoq, inuit 350-it missaanniittut Tunup avannaani Nunami Allanngutsaaliukkami Kong Oscar Fjordimi ajunaarnersuarmik sungiusaqataasimasut, angerlakaannginneranni.
– Nunat peqataasut oqarpoq sungiusarneq annertuumik unammilligassaasimasoq ilikkagarpassuaqarsimallutillu. Tunup avannaa avinngarusimasorujussuuvoq attaveqaatit eqqarsaatigalugit, taamaattumik pilersorneqarnissaq aamma unammilligassaasimavoq annertooq. Pilersuineq ukioq manna siornarnit ingerlalluarnerujussuusimavoq. Oqaatigiuminaappoq pitsaalluinnartunngorsinnaanersoq, tamannaliuna aamma pissutigalugu sungiusartartugut, Karsten Riis Andersen oqarpoq.
Atuaruk: "Nunat immikkoortoqatigiinnik makkuninnga atugassaqartitsipput"
Atuaruk: "Sarex-imik sungiusarnermi manna takorloorneqarpoq"
Sungiusarneq akiminut naleqquppa?
– Issittumi Sakkutooqarfiup pisortaa, general Stig Østergaard Nielsen oqarpoq sungiusaqatigiinneq 3 millioner koruunit missaannik akeqarsimasoq. Tassa saniatigut aningaasartuutit eqqarsaatigissagaanni angallatit peqataasut tamaaneereersut. Sungiusarneq akiminut naleqqussoraajuk?
– Aap, sungiusarneq akiminut naleqqulluinnarsoraara. Aalajangiisuulluinnartumik pingaaruteqarpoq atortut sumiiffimmi pigineqartut misiligarneqartarnissaat. Qularutiginngilara sungiusarnermi matumani atorneqarsimasut atorluagaasimasut.
Sermitsiaq.AG-p allassimaneratut ilimanarpoq aappaagu Canada taamatut ujaasinermik annaassiniarnermillu sungiusarnermi ingerlatsisuujumaartoq, immikkoortut suli inissinneqarsimanngikkaluartut. Naatsorsuutigineqarpoq sungiusarneq septembarimi ingerlanneqarumaartoq, soorlu ´Sarex Greenland Sea 2012´ aamma ´Sarex Greenland Sea 2013´ aamma septembarimi ingerlanneqartarsimasut.
Ukioq manna sungiusarnermi Tunup avannaani Mestersvigip aamma Kong Oscar Fjordimi Ella Ø-p akornanni ingerlanneqartumi, inuit 350-t missaanniittut peqataapput, untritillillu marlussuit Nuummi, Reykjavikimi Danmarkimilu peqataallutik.
Tamatuma saniatigut ataqatigiissaariveqarpoq Thorshavnimi, Stavangerimi, Aarhusimi, Murmanskimi kiisalu amerikarmiut canadamiullu ataqatigiissaarivii sungiusarnermi ´pappiaqqatigut´ peqataapput.
Sarex 2013-imit allaaserisat tamaasa atuakkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER