pineqaatissiisarnerit
Pinerluuteqarsimasut singernermikkut ikkussiffigineqartalersinnaanerat qanilliallattoq
Allaanerusumik pineqaatissiisalernissamut siunersuut inatsisinut atuutsitinermut naalakkersuisumit soqutigineqartoq
Pinerlussimasut singernermikkut ikkussiffigineqartalersinnaanerat Inatsisartut upernaanerani ataatsimiinneranni aappassaaniissavaat.
Tassunga Inatsisartuni ilaasortat Siumumeersut Doris Jakobsen Kristian Jeremiassenilu siunersuuteqarput.
- Inatsiseqarnermut Ataatsimiititaliaq qujaffigerusuppara nunatsinni pineqaatissinneqarsimasut angerlarsimaffimminni nakkutigisaallutik elektronisk-imik singernermikkut ikkussiffigineqartalersinnaanerat pillugu suliassaq sukumiisumik peqqissaartumillu suliarisimammassuk, ilaqutariinnermut inatsisinillu atuutsitinermut naalakkersuisoq Martha Lund Olsen Siumut oqarpoq.
- Naalakkersuisut ataatsimiititaliaq isumaqatigivaat oqarmata, nunani allani misilittakkat pitsaasut ilisimaneqarnerat toqqammavigalugu pinerluuteqaqqinnginnissamut ilaqutariillu ingerlaqatigiiginnarsinnaanissaanut isuma, angerlarsimaffimmiiginnarluni ilumut eqqunneqartariaqarnersoq misissuiffigiumammagu.
- Naalakkersuisuttaaq isumaqatigivaat ataatsimiititaliaq isumaqarmat, angerlarsimaffimmiiginnartinneqarluni pineqaatissinneqarsinnaanissamut killilersuiffiginagu misissuiffigineqaqqittariaqartoq. Tassami naamanngimmat assersuutigissallugu danmarkimi singernikkut ikkusimatitsilluni periuserineqartoq kisiat toqqammavigineqarnissaa, Martha Lund Olsen Inatsisartut oqaluttarfianni sisamanngorpat oqassaaq.
Inatsip allannguiffigineqarnissaa Naalakkersuisunit akuersaarneqassasoq oqaatigineqarpoq.
Pinerlussimasut singernermikkut ikkussiffigisarnerannik inatsit Danmarkimi 2005-mi atulersinneqarpoq.