Skip to main content

Pinerluuteqarsimasunik Isumaginnittoqarfik: Aaqqikkiartorput, arriitsumilli

Pinerluuteqarsimasunik Isumaginnittoqarfimmi pisortaq Naaja Nathanielsen oqarpoq, pinerluuteqarsimasunut inissiisarfimmi sulisut aningaasarsiaasa qaffaassutissaasa inaarutaasumik atsiorneqarnissaat pissangalluni utaqqillugu

Nuummi pinerluuteqarsimasunut inissiisarfimmi immikkoortortaqarfiit tamarmik atorneqarsinnaaanngornissaannut sulisussanik 15-inik suli amigaateqartoqarpoq.

Taamaalilluni siorna novemberip qaammataanili taamatut inissisimasoqarnera pitsaanerulersimavallaanngilaq.

Kalaallit Nunaanni Pinerluuteqarsimasunik Isumaginnittoqarfimmi pisortaq Naaja Nathanielsen ilisimatitsvoq, atorfinnit 49-sunit 38-t maanna inuttaqartinneqalereersut. Peqatigitilluguli nalilerpaa, piffissami sivisuumi napparsimasoqarmat sulisunik immikkut 15-inik pisariaqartitsisoqartoq.

- Suna tamarmi aaqqikkiartorpoq, arriitsumilli, Naaja Nathanielsen Sermitsiaq.AG-mut oqarpoq.

- Neriuutigaarput, ukioq manna immikkoortortaqarfiit tamarmik atuutsinneqalersinnaanerat.

Aningaasarsiat qaffaassutissaat

Pinerluuteqarsimasunut inissiisarfiup ammasortaani immikkoortortaqarfiit arlallit suli atorneqalinngillat, sulisussatut pisariaqartinneqartut suli amigaataammata. Inissiisarfiup matoqqasortaani immikkoortortaqarfiit tamarmik atorneqalereerput.

- Sooruna immikkoortortaqarfiit tamasa ammarsinnaannginnatsigit ajornartorsiutaavoq, inissinneqartussanimmi utaqqisoqarpugut. Naapertuilluassuseq eqqarsaatigalugu tamanna ajorluinnarpoq, pinerluffigineqarsimasummi takusinnaasarpaat eqqartuunneqarsimasut pineqaatissiissutimik atuutsinneqalernissaat utaqqisaraat.

Ukioq mannamut aningaasanut inatsisissaq Folketingimi isumaqatiginninniutigineqarmat, inissiisarfinni sulisut politiillu aningaasarsiaasa qaffaassutissaannut aningaasanik immikkoortitsisoqarpoq. Aningaasalli suli atuutsinneqalinngillat, tassa Kalaallit Nunaannit folketingimi ilaasortaatitat marluk isumaqatigiinnginnerat pissutigalugu, inatsisinik atuutsitsinermut ministeeriaqarfimmi isumaqatiginninniarneq sivitsulerami.

- Tamatta utaqqivugut iluatsitsisoqarnissaanillu neriuuteqarluta. Aningaasalli immikkoortinneqareeraluartut isumaqatigiissut atsiorneqartinnagu susinnaanngikkallarpugut.

Nersorinninneq

Naaja Nathanielsen isumaqarpoq, aningaasarsiat qaffanneqarnerisigut inuit ullumikkut soqutiginninngitsut kajumissuseqalersinneqarsinnaasut.

- Tamatuma saniatigut maanna sulisutsinnut sulilluartunut tamanna annertuumik nersorinninneruvoq. Qularinngilara taamatut nersorinninneq taakku ulluinnarni sulinerannut annertuumik iluaqutaassasoq.

Upernaap ingerlanerani Danmarkimi inissiisarfinni maanna sulisut soraarninngornikullu katillutik aqqaniliusut ikiuukkiartorniarput. Tamanna pisariaqarpoq, Nuummi inissiisarfimmi sulisut ilarpassuisa misiligutaasumik sulinerat pissutigalugu, tassa pineqartut suli ilinniakkaminnik ingerlatsigamik. Taakku ilarpassui upernaamut pikkorissartinneqassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER