Pinerluttulerinermi inatsimmik iluaqutaajunnaarsitsineq

Kalaallit Nunaat Europap Kitaani nunani pineqaatissiinerpaasarpoq. Ukiuni 16-ini pineqaatissiinerit sakkortunerusut »nunap eqqartuussisaasianik immikkuullarissuusumik qitiusumik tunngaviinik uniuineq kingulliussasoq« ilisimasalik naliliivoq.

Aaqqissuussaaneq iluatsinngilaq. Inunnut taakkununnga pineqaatissiinerit qaffakkaluttuinnarneqarnerat ilumut naleqquppa?

Kalaallit Nunaanni pinerluttarneq pillugu ilisimatusartumit siuttumit apeqqut taanna oqaatigineqarpoq, pineqaatissiisarnerullu qaffanneqannginnerani eqqarsarluaqqaarnissamut tunngavissaqartoq taanna isumaqarpoq.

Aviisi AG taama allappoq.

- Kalaallit Nunaat inuit 100.000-ugaangata 200-nik inissiisarfimmiittoqartartoq, nunani tamalaani kisitsisitigut takussutissani takuneqarsinnaavoq. Nunani avannarlerni parnaarunneqartut 70-it qaangerneq ajorpaat. Europap Kitaani nunat allat Kalaallit Nunaannit amerlanerusunik parnaarussaqanngillat. Maanna amerlanerusut sivisunerusumik pineqaatissinneqarsimasut inissiisarfianniitinneqartalernissaat siunnersuutigineqarpoq, Annemette Nyborg Lauritsen, Ilisimatusarfimmi lektori, ph.d., taama oqarpoq.

- Inunnut ulorianaatilimmik pinerluttarnermi kisitsisit qaffasissorujussuunerat soorunami ernumalersitsisarpoq. Arlaannik iliuuseqartoqartariaqarneranut kikkut tamarmik isumaqataapput. Kisianni ukiut 16-it tikillugit pillaanerit aaqqiissutaanersut imaluunniit iliuusissaarutiinnarnerunersoq apeqqutaavoq.

Sumiginnakkat

Annemette Nyborg Lauritsenip oqaaseqaatai naatsut ersarissullu – qarasaasiakkut attavik aqqutigalugu – politikerinut suliamullu attuumassuteqartunut arlalinnut, tulleriiaarlutik uerujussuartunut tusarnaarluartunullu saqqummiunneqarput. Tamanna Christiansborgimi pivoq, Folketingimi Kalaallit Nunaat pillugu ataatsimiititamut ilaasortat siunissami eqqartuussiviup qanoq ittuunissaa pillugu tusarniaanermut aggersarneqarput, Annemette Nyborg Lauritsenilu, ilisimasallit arlaliusunit Kalaallit Nunaannit peqataavoq; ullormilu tassani Nuuk ukiuunerani maannamut silarlunnerpaaffigisaani tamanna pivoq. Aput igalaanut sakkortuumik tuttarluni.

Christiansborgimi pissutsit eqqissisimanerupput, tassani politikerit malinnaalluarlutik ilanngussanut tusarnaarput. Pineqaatissinneqarsimasorpassuit peroriartornerminni atugarliortuusimasut, Annemette Nyborg Lauritsenip nassuiarpaa.

- Innuttaasut aalajangersimasut pineqanngillat. Taakkuunngilluinnarput. Taakku atuarfiup inunnillu isumaginninnerup aaqqissuussaalluannginnerisa kinguneraat. Kinguaariit tulleriiaarlutik sumiginnarneqartarsimapput. Sakkortunerusumik pineqaatissiiginnarnikkut, inunnut naammaginartumik ikiorneqarsimanngitsunut eqquisoqassaaq.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS