Pineqaatissinneqartunut inissiisarfimmi pisortortat angajoqqaanit politiinut unnerluutigineqartut
Pineqaatissinneqartunut inissiisarfimmi nutaami tigummigallarneqartunut marlunnut angajoqqaajusut, ernitik 26-nik ukiullik qanoq pineqarneri quarsaarutigingaaramikkit, politiinut unnerluutiginninniarput.
Leif Pedersen aamma Gitte Adler Reimer tamarmik hashimik suliami annertuumi unnerluutigineqartunik erneqarput, taakkulu Nuummi pineqaatissinneqartunut inissiisarfimmi nutaami tigummigallarneqarnerannut tamanna nassuiaatissaavoq.
Pineqaatissinneqartunut inissiisarfimmi pisortat iluamik tigusiumanngimmata aamma tigummigallarneqartut nerisaqarnissaat qulakkeernianngimmassuk, Sermitsiaq.AG-mi maanna saqqummerput.
Sapaatip-akunnerata siuliani Leif Pedersenip ernini pulaarpaa, iffiami, qallersuutissanik, sodavandimi aamma pizzanik marlunnik qerisunik nassaallugu. Pineqaatissinneqartunut inissiisarfitoqqami taakku pajugutigiuartarpai.
Illumi malittarisassat
Pinerluttunik Isumaginnittoqarfiup ”Illumi malittarisassai” naapertorlugit taassuma ima allaqqasoq atuarsinnaasimavaa:
”Nerisassanik imaluunniit allanik inuulluarniutinik aamma pequtinik misissorneqarsinnaanngitsunik tunniussisoqaqqusaanngilaq”.
Taamaattumik Leif Pedersenip pulaareernermi kingorna nerisassat nassatani angerlaateqqissallugit peqqunerarami tupigutsattorujussuuvoq.
Pineqaatissinneqartunut inissiisarfimmi sulisut arlallit oqaloqatigisaqattaareerlugit pappiaqqamik tunineqarpoq, nerisassat imeruarsaatillu nassarneqarsinnaanngitsut tassani atuarneqarsinnaavoq. Allagaq pinerluttunik isumaginnittoqarfiup ilisarnaataanik nalunaarsorneqarsimanngimmat suminngaanneernera Leif Pedersenip ilisimanngilaa. Pinerluttunik Isumaginnittoqarfiup nittartagaani allagaq aamma Sermitsiaq.AG-p nanisinnaanngilaa.
Weekendimi nerisassaqanngitsoq
Unnerluutigineqartut ullup tulliani eqqartuussiviliartussaapput, taakkulu aatsaat ualikkut 16.30-ip missaani pineqaatissinneqartunut inissiisarfimmut uterput. Tigummigallarneqartut namminneq kioskimut nerisassarsiniarlutillu nammineq igasartussaapput.
Gitte Adler Reimerip ernera arfininngornermi anaanaminut attaveqarpoq. Taanna sukkortuuvoq, taamaattumillu nerisaqarnermini malittarisassaqarpoq, taamaalilluni ilisimajunnaannginniassagami.
- Ernera nerisassarsiniarnissaminut saariarfissaarussimavoq. Pineqaatissinneqartunut inissiisarfik attaveqarfigaara, kisianni kioski ammarusunngilaat, Gitte Adler Reimer oqaluttuarpoq, Pineqaatissinneqartunut inissiisarfimmut nerisassanik aggiussiniarluni aalajangerpoq.
- Sulisut sakkortuumik oqaloqatigereerlugit erninnut nerisassanik tunniussitinneqarpunga, Gitte Adler Reimer ilisimatitsivoq, tamatuma saniatigut Pineqaatissinneqartunut inissiisarfimmi kioskimi pisiassat sukkortunut tulluartuunnginnerarlugit maalaaruteqarpoq.
Assuarnartorujussuaq
Inissinneqarsimasut sullinnissaanut sulisut piareersimanngitsut, taanna misigisimavoq.
- Ernera sukkortuusoq nalunngilaat, taamaakkaluartoq ikiorumanngilaat. Tamanna assuarnartorujussuuvoq.
- Quinaqutaa tassaavoq, eqqartuussivimmi meeqqatsinnut nerisassanik tunniussisinnaavugut. Taakku nerisassat ajornaquteqanngitsumik pineqaatissinneqartunut inissiisarfimmut eqqussinnaavaat.
Angajoqqaat paarnaarussiviup pisortaanut, Tina Damimut, aamma Pinerluttunut Isumaginnittoqarfimmi pisortamut Naaja H. Nathanielsenimut maalaaruteqarput. Kisianni taakku marluullutik angajoqqaat itignerusumik oqaloqatiginianngilaat, ”angajoqqaat suliami attuumassuteqannginnerannut” malinnikkami, ernerisalu tungaannit ”pisinnaatitsissummik” peqanngimmata.
- Pinerluuteqartut inissiisarfiannut inissinneqarsimasut qaqugukkullunniit atukkat pillugit maalaaruteqarsinnaanerannut innersuussissaanga, Naaja H. Nathanielsen, marlunngornermi ullaakkut Leif Pedersenimut mailikkut taama allappoq.
Nalunaarummut nutaamut innersuussisoq
Kisianni ima ilisimatitsissuteqarpoq:
- Nalunaarut nutaaq aamma pineqaatissinneqartunut inissiisarfik matoqqasoq tigummigallarneqartut nalunaarummik siulianik atuisimasut sungiusimasaannut ammasumut soorunami allannguutaavoq. Pisortatut pingaarnertut akisussaasutut paasinninnera naapertorlugu, allaatigisattut ”pissutsit ajorluinnarnerannik” isumaqanngilanga.
Sermitsiaq.AG-p Naaja H. Nathanielsen oqaloqatigaa, taassuma suliaq aalajangersimasoq oqaaseqarfigerusunngilaa, maalaarutitut sulianngorsinnaammat. Kisianni Pinerluttunik Isumaginnittoqarfik ilaqutaasunut aamma paarnaarussanut attaveqarnermini kukkussuteqarsimasoq nassuerutigaa.
Tassami Pinerluttunut Isumaginnittoqarfiup Nuummi Paarnaarussivimmut tunngatillugu malittarisassanut linkiliussaa nutarterneqarsimananilu eqqortumik tutitsinngilaq.
Assersuutigalugu ”nalunaarut” atulerpoq, tigummigallarneqartut sukaterinertut aamma pisinnaatitaaffiinik annikillisaanertut misigisassaat.
Nittartagaq iluarsineqassaaq
- Nittartakkap iluarsineqartariaqarnera qularutissaanngilaq, Pinerluttunut Isumaginnittoqarfimmi pisortaq neriorsuivoq.
Taassuma aamma saniatigut ilisimatitsissutigaa:
- Pissutsit malittarisassanik naapertuinngitsut siornatigut akuerisariaqarsimavagut. Taamaattumillu tigummigallarneqartut pineqaatissinneqarsimasunut inissiisarfimmi nutaami matoqqasumi aamma ilaatigut ammasuni malittarisassat sukaterinertut isigissavaat.
Maalaarummik akissuteqarfigisinnaasaminik qilanaaruteqarluni Naaja H. Nathanielsenip oqaatigaa.
- Suliffeqarfipput piviusorsiortumik aamma isorinnittumik qiviarsinnaanissaa soorunami kissaatigaara. Kisianni tamanna eqqortumik pissaaq, tusagassiorfitsiguunngitsoq, pisortaq oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...