Pineqaatissinneqarsimasunut inissiisarfissaq ataatsikkut tamakkerlugu atulersinneqassanngilaq

Sulisussaaleqineq pissutigalugu pineqaatissinneqarsimasut inissiisarfissap ilamernga maajimi ammassagunanngilaq. Nuummi pineqaatissinneqarsimasunut inissiisarfimmi ammasumiitinneqartut nunatta iluani allanut nuutsinneqassapput.

Nuummi pineqaatissinneqarsimasunut inissiisarfissaq maajimi ammarneqarpat, tamakkerlugu ingerlaannaq ammarneqassanngilaq. Inatsisinik atuutsitsinermut ministeriaqarfiup folketingimi Kalaallit Nunaat pillugu ataatsimiititaliamut allakkiaani taama allassimavoq.

Pineqaatissinneqarsimasunut inissiisarfissaq marlunngorlugu avinneqarallassaaq, immikkoorlutik ammarneqartussanngorlugit.

Siullermik pineqaatissiisarfiit matoqqasut marluk maajip naanerani ammarneqassapput. Ammarneqarpat piffissami killiligaanngitsumi Herstedvesterimiitinneqartut nuutsinneqarsinnaalissapput. Nunatsinnilu tigummigallagassanngortinneqarsimasut, pineqaatissinneqarnissaminnut utaqqisut aamma inissinneqassallutik.

Sulisussarsiorneq

Nuummili pineqaatissinneqarsimasunut inissiisarfimmi ammasumiittut nuutsinneqarsinnaanngikkallarput. Sulisussaaleqineq pissutaavoq.

- Sulissarsiuleruttorpugut, sulisussarsiornerli ajornakusoorpoq, Kalaallit Nunaanni pinerluttunik isumaginnittoqarfimmi pisortaq, Naaja Nathanielsen Sermitsiaq.AG-mut oqarpoq.

Taanna oqaluttuarpoq pineqaatissinneqarsimasunut paarsisutut suliffissarsiortoqaraluartoq, soqutiginnittulli ilaat pinerluttunik isumaginnittoqarfimmit itigartinneqartariaqartartut. Pissutaasut ilagisinnaavaat qinnuteqartut ilaat siornatigut pineqaatissinneqarsimasuusarmata, qassinik ukioqalereersimanissamut piumasaqaatinik naammassinnissinnaanngimmata, tassa 21-liisimanngimmata imaluunniit qallunaatut sapinngisaat naammaginanngimmata taamatullu paarsisutut ilinniagaqarnissamut naammassinnissinnaanatik.

Nuunneqassapput

Sulisinnaasut massakkutut isikkoqarallartillugit, pineqaatissinneqarsimasunut inissiisarfimmi ammasuusussat aappaat maajip naanerani ammarneqarsinnaanngikkallarpoq.

Taarsiullugu Nuummi inissiisarfimmiitinneqartut piffissami aalajangersimanngitsumi illoqarfinnut allanut nuutinneqarallartariaqassapput.

- Ammannginnermi sulisussanik naammattunik sulisoqalernissarput mattutivissinnaanngilarput; massakkutulli isikkoqarallartillugu illoqarfinni allani inissanik pissarsiulereertariaqarpugut, Naaja Nathanielsen oqarpoq.

Pineqaatissinneqarsimasut qassit pineqarnersut, taassuma ilisimatitsissutigerusunngilaa.

Pineqaatissinneqarsimasunut inissiisarfissaq tamakkerluni qaqugu atulerumaarnersoq allakkiami erseqqissaassutigineqanngilaq.

Nalimmassarneq

Pinerluttunik isumaginnittoqarfiup naatsorsuutai malillugit pineqaatissinneqarsimasunut inissiisarfittaassaq 49-nik betjenteqassaaq. Taamali amerlatigisunik sulisoqalernissaq massakkut anguneqarsinnaanngilaq; ikinnerusunilli sulisoqartarneq takornartaanngilaq. Ukiullu ataatsip ingerlanerani qaammatini sisamaasuni Nuummi pineqaatissinneqarsimasunut inissiisarfik naammattunik sulisoqarsinnaasimanera, nalinginnaasuunngilaq.

- Sulisugut apeqqutaatillugit tigummisassagut nalimmassartariaqarpagut.

Naaja Nathanielsenip erseqqissarpaa siunissami sulisoqarneq allatut isikkoqaratarsinnaasoq, taamatullu sulisut 49-sussatut maanna nalilerneqaraluartoq tamanna siunissami allaaneroratarsinnaasoq. Kalaallit Nunaanni pinerluttunik isumaginnittoqarfiup ingerlatsivimmik anginerusumik matoqqasunillu immikkoortortaqarfilimmik ukiumi ataatsimi siullermi ingerlatsinini nalilersussavaa misilittakkanillu katersiffigalugu. Kingorna nalilerneqassaaq sulisut ikinnerusut amerlanerusulluunniit pisariaqartinneqarnersut.

Powered by Labrador CMS