Pineqaatissinneqarsimasunut inissiisarfimmi betjentit pitsaanerulingaatsiarsimasut

Pinerluuteqarsimasunut inissiisarfinni betjentit ukiut marluk matuma siornanut sanilliullugu suliartornissaminnut toqqissisimanerusalersimapput.

VIVE-p, Atugarissaarnermut Nuna Tamakkerlugu Ilisimatusarfik Misissueqqissaartarfillu, nalunaarusiaani kingullermi taamatut inerniliisoqarpoq, nalunaarusiami atuarneqarsinnaavoq, ptsd-qartartut, isumatsassungaatsiartartut, annilaanngateqartartut stressertartulluunniit ikilingaatsiarsimasusut.

Nalunaarusiami 2020-meersumi tarnikkut artukkerneqarnermi qisuariartarnerit saqqummiunneqarput - taamanikkullu pinerluuteqarsimasunut inissiisarfimmi betjentit peqqissusaat allatorluinnaq isikkoqarsimallutik.

Suliniutit arlallit aallartinneqarsimasut

Taamanikkut sulisut pingasuugaangata ataaseq stressilertarsimavoq, arlallilli imaluunniit sulisut tallimagaangaata ataaseq ptsd-qalertarsimavoq, annilaangasalersimalluni isumatsangaatsiartalersimallunilu. Pisartut tamakku sakkortuut pinaveersaartinniarlugit upalungaarsimanerlu pitsanngorsaaffiginiarlugu suliniutit arlallit taamanikkulli aallartinneqarsimapput.

Tamatuma saniatigut suliussarsiorneq sulisunillu amerlanerusunik attasiinnarniarneq ukkatarineqarsimavoq - tamannalu ilutsiffiusimasoq, Fængselsforbundemit 2022-mi ilisimatitsissutigineqarpoq. Tamatumunnga pissutaavoq 2020-mi aningaasarsiat qaffangaatsiarneqarsimanerat, tassani Nuummi pinerluuteqarsimasunut inissiisarfimmi sulisut 40 procentinik amerlanerulersimallutik.

Takussutissiami qulaaniittumi kisitsisit takutippaat, suliniuteqarsimaneq pitsaaumik sunniuteqarsimasoq. Pinerluuteqarsimasunut inissiisarfimmi betjentit ullumikkut affaannaat ptsd-eqalertarput, tassa sulisut 11,5 procentii.

Sulisut 8,3 procentii annilaangalertarlutillu isumatsangaatsiartarput, sulisulli sisamaagaangata ataaseq stressilertarluni.

Suli pitsaanerulersitsisoqarsinnaasoq

Pitsaalluinnartumik ineriartornerusoq, Kalaallit Nunaanni Pinerluuteqarsimasunik isumaginnittoqarfimmi pisortaanerugallartoq Christian Høygaard oqarpoq.

- Sulinermi avatangiisit suliffimmi pingaaruteqarnerpaat ilagaat. Taamaammat nuannaarutigilluinnarpara, suleqatigilluta suleqativut uniformillit ullut tamaasa inissisimasutsinnut pingaarutilinnik suliaqartartut pitsaanerusunik atugassaqartilersinnaasimagatsigit, taanna oqarpoq.

Christian Høygaardip peqatigitillugu erseqqissaassutigaa, suliaq suli naammassineqaqqajanngitsoq. Misissuisimanerummi takutissimavaa, Pinerluuteqarsimasunik isumaginnittoqarfimmi suli pitsaanerusumik oqaloqatigiittoqartarsinnaasoq pitsaanerusumillu oqaloqatigiittoqartalissasoq.

- Immitsinnut paaseqatigiilluartarnitsigut tatigeqatigiinnitsigullu artukkiisarneq pinaveersaartissavarput, taanna oqarpoq, nangillunilu:

- Aamma sakkortuumik pisoqartillugu pinaveersaartitsinermi atortuvut tigussaanerusumik atortassavagut.

Aappaluttoq, sungaartoq qorsullu

Suliniut pingaarutilik tamakkiisumik takunnissinnaatitsilerlunilu sulinermi artukkerneqartarnermik annikillisitsisimasoq taaguuteqarpoq ”Aappaluttoq, sungaartoq qorsullu”.

Taaguutaa qullernut angallannermi najoqqutassanut assersuusssaavoq, pinerluuteqarsimasunut inissiisarfimmi betjentit ilaatigut aaqqiagiinngittoqartillugu unitsitsiniarlutik malitassaat.

Pinerluuteqarsimasunik isumaginnittoqarfimmit oqaatigineqarpoq, sulisut inissinneqarsimasullu aaqqiagiinngittoqartillugu assigiissaarnerusumik sulisoqartalersimasoq tamatumalu malitsigisaanik stressertoqannginnerulerlunilu uivertoqarpallaarunnaarsimavoq.

Tamakkua saniatigut pitsaasumik allanngoriartortoqarnera taperserniarlugu aqutsisussatut ilinniartitsineq annertuumik ukkatarineqarsimavoq.

Kalaallit Nunaanni Pinerluuteqarsimasunik isumaginnittoqarfimmit sulinermi atugassarititaasut pitsanngorsaaffigineqarnerat ingerlatiinnarneqarpoq - ilaatigut napparsimalluni sulinngittarneq eqqarsaatigalugu kiisalu tarnip pissusiinik ilisimasalimmit ikiorserneqartarneq upalungaarsimasuunerlu pitsaanerulersinniarlugit immikkut ittumik suliniuteqarnikkut.