Pimmatiginnittarneq pinaveersaartinniarlugu Naalakkersuisut periusissiorusuttut
Meeqqat atuarfianni pimmatiginninnittarneq pinaveersaartinniarlugu Naalakkersuisut periusissiornissaminnut piareersimapput. Inatsisartuni siunnersuummut akissuteqaammi taama allassimavoq.
Naalakkersuisut peqquneqassapput meeqqat atuarfianni pimmatiginnittarneq pinaveersaartinniarlugu periusissioqqullugit. Periusissiaq upernaakkut 2020-mi piareersimassaaq. Aqqa Samuelsen (IA) taama Inatsisartuni aalajangigassatut siunnersuuteqarpoq.
Siunnersuut Naalakkersuisut isumaqatigaat. Ilinniartitaanermut, kultooreqarnermut, ilageeqarnermut nunanullu allanut tunngasunut Naalakkersuisoq, Ane Lone Bagger, akissuteqaatimini allappoq Naalakkersuisut siunnersuummik naammassinnikkusuttut.
Pinaveersaartitsineq siammasinnerusoq
Taannaannaanngilarli. Naalakkersuisut periusissiaq siammasinnerutikkusuppaat, meeqqat atuarfianni pinaveersaartitsisoqarnissaa kisiat pinnagu.
- Pimmatiginnittarneq pillugu suliniuteqarnissaq meeqqanut inuusuttunullu tamanut attuumassuteqartariaqarpoq, meeqqanit suli atualinngitsuniit, meeqqat atuarfiini inuusuttullu ilinniarfiini, aamma naalakkersuisoqarfiit akimorlugit Naalakkersuisut, kommunit allallu soqutigisaqartut, pimmatiginnittarneq pillugu pinaveersaartitsinermik akiuiniarnermillu suliaqartut qanimut suleqatigiinnikkut pinaveersaartitsinermik aaqqissuusseqatigiinniartariaqarput, Ane Lone Bagger allappoq.
Piffissaliineq
Siunnersuut Inatsisartuni pingasunngornermi maajip arfineq-pingajuani suliarineqassaaq. Naalakkersuisullu allannguutissatut siunnersuuteqarput. Allannguutitut siunnersuutigineqartoq tassaavoq periusissiami meeqqat suli atualinngitsut, meeqqat atuarfii inuusuttullu ilinniarfii pimmatiginnittarnermut pinaveersaartitsineq pillugu periusissiorfigineqassasut, taannalu kommunit soqutigisaqartullu allat suleqatigalugit naammassineqassasoq.
Naalakkersuisut ilanngullugu isumaqarput periusissiap atuutilerluni naammassineqarnissaanut aalajangersimasumik piffissaliisoqassasoq.