Pilersuisoq Pisiffillu: Inuussutissat ilaasa akii appartinneqarput
Naalakkersuisut RAL-imut ikiorsiissutaat atuisut Pilersuisup pisiniarfiini Pisiffimilu inuussutissat pisiarineqarnerpaasartut 140-t akiinik sipaaruteqarnissamut iluaqutaassapput.
Pilersuisoq ulluinnarni inuussutissat pisiarineqarnerpaasartut 140-t akiinik appaavoq.
Pilersuisup pisiniarfiini pisortaaneq Brian Weuge Chemnitz Sermitsiaq.AG-mut taamatut ilisimatitsissuteqarpoq.
Ukrainemi sorsuttoqarnerata kinguneranik aningaasat naleerukkiartornerat unikaallatsinniarlugu avannamut assartuinermi uuliamut tapiliussap appartinneqarnissaanik Naalakkersuisut Royal Arctic Linellu isumaqatigiissuteqarnerisigut akit appartinneqarput.
Isumaqatigiissut ukiup 2022-p sinnerani atuuttussaq, ulluinnarni inuussutissat akikillineqarnerisigut atuisunut iluaqutaalernissaa anguniarlugu isumaqatigiissutigineqarsimavoq.
Pisiffimmi Pilersuisumilu akit appartinneqarput.
Pisiffik sukkanerusumik suliaqarsimasoq
Pisiffimmit ilisimatitsissutigineqaqarpoq, uuliamut tapiliussap qanoq sipaarutigineqarsinnaanera naatsorsorneqarsimasoq, sipaarutineqartussallu miliuunilikkaat ulloq isumaqatigiissuteqarfiusoq ullormik ataatsimik sioqqullugu ulluinnarni inuussutissatut pisariaqartinneqarnerpaasartut akiisa appartinneqarnerannut atorneqarsimasut.
- Siunertarineqartup tapersersorneqarnissaata Pisiffimmut pingaaruteqarsimanera qularutigineqassanngilaq, sipaarutaasullu tamarmik atuisunut iluaqutaasussaallutik, nittarsaassinermi pisortaq Tina Hansen oqarpoq.
Brugsenimit akit appartinneqarnissaat isummerfigineqarsimanngilaq, uuliamut tapiliussap appartinneqarnerani immikkuualuttut ilaannik RAL-imit suli nalunaaruteqartoqarsimanngimmat.
- Brugsenip pisiniarfiutaasa amerlanersaat illoqarfinni anginerusunippuut, pisiniarfiuteqarfitsinnilu appaanerit atuutsinneqassanersut suli nalornissutigaarput, Brugsenimi pisiortortarnermut pisortaq Randi Vestergaard Evaldsen oqarpoq.
Pilersuisumit ilisimatitsissutigineqarpoq, tunisassianut 140-sunut pisisartut sipaarutissaat 6,4 procentiusoq, sipaarutillu 2023-p qiteqqunnerani nioqqutissat nutaat Avannaanut tikiunneqarnissaasa tungaanut atuutissasut.
1 aamma 3 koruunit akornanni akikillineqartut
Pilersuisup pisiniarfiini pisortaaneq naapertorlugu taamatut periuseqarnermi, ikiorsiissuteqarniarnermi siunertarineqartumut qaninnerpaamik iliuuseqartoqarsimavoq, tassalu akit aalaakkaatinniarlugit avinngarussimasuni innuttaasunut ikiuunnissaq.
Akit 1 aamma 3 koruunit akornanniittumik appartinneqartussat tunisassianut ukunnnga assersuutigalugu atuuttussanngortinneqarsimapput:
- Yoghurt punnerlu Kærgården qerisut
- Iffiat qerisut
- Qajuusat
- Araba kaffe
- Naatitat qerisut
- Neqi aserortigaq qerisoq
- Juice