Pilersaarut: Uummannami akunnittarfik ammaqqissaaq
Uummannami akunnittarfitoqqap ammarneqarnissaanut pilersaarutit aallartingaatsiareerput, taanna ullumikkut meeqqanut qulinit aqqaneq-marlunnut atuartut angerlarsimaffiattut atorneqarpoq.
Ilulissani mittarfimmik 2.200 meterisut takissusilimmik sanaartortoqarnissaanik aalajangiisoqarnerani, takornarissat neriuutigineqartutut Nunatta Avannaanukaasalerpata unnuinissamut periarfissat annertusissaput.
Takornariaqarnermut piareersimasut
Inuussutissarsiornermut pisortaq Hans-Peter Lennert piareersarnerit aallartereersimasut Sermitsiaq.AG-mut ilisimatitsivoq, taamaalilluni mittarfiup nutaap pilersitaani takornariaqarnerulernissaanut piareersimasoqassammat.
- Atuartut angerlarsimaffiannik nutaamik sanaartortoqarnissaa pilersaarutaavoq. Atuartut angerlarsimaffitoqaat nutarsarnikuugaluarparput, kisianni inersimasunut atuartitsiffittut atorneqassaaq, Hans-Peter Lennert ilisimatitsivoq.
Pisariaqartitsineq annertunerusoq
Tassaarsuaqarnerata kingorna aamma nunaqarfinni eqqugaasuni innuttaasut qimagussortinneqarnerisa kingorna inuusuttut amerlanerusut atuartut angerlarsimaffianniitinneqarnissaannik pisariaqartitsineq annertusisimavoq.
Tamatumunnga atatillugu atuartut angerlarsimaffiannik suliniut EU-p aningaasaataat atorlugit aningaasalerneqarnissaanik kommuni ilimagisaqarpoq.
Taakku atuartut qulinit aqqaneq-marluk tungaannut amerlassusillit, akunnittarfimmilu najugaqartut, ineerarpassuit tamakkiisumik atunngilaat.
Init 50-it
- Akunnittarfitoqaq 50-inik ineeraqarpoq, takornarialerisullu arlallit maani aningaasaliinissamut soqutiginnipput, Hans-Peter Lennert ilisimatitsivoq.