Pilersaarusiorneq: Biili iluaqutaava iluaqutaanngilaluunniit
Illoqarfiit pingaarnersaata kommuniani innuttaasut amerliartuinnavipput, aamma biilit, lastbiilit sanasullu maskiinarsui ukiumiit ukiumut amerliartuinnavipput. Amerliartorpallaaqimmata kommuni angallannermut tunngatillugu iliuusisssatut pilersaarusiornissaq siunertararlugu misissueqqissaarsimavoq.
Biili iluaqutaava iluaqutaanngilaluunniit? Inuinnaat biilertarnerat unikaallatsinniarlugu, ataatsimoorussamillu angallassisarneq pitsanngorsaafiginiarlugu kommuni qanorluunniit iliuuseqassava? Angallaffiunerpaami biilertut sukkanerusumik apuuttalernissaat anguniarlugu aqquserniornissamut aningaasanik amerlanerusunik immikkoortitsisoqassava? Siunissami illoqarfimmik ineriartortitsineq piujuartitsinermik tunngaveqassava?
Apeqquterpassuit taakku Kommuneqarfik Sermersuup misissueqqissaarneq, ukiorpassuarni atuuttussamik angallannermut tunngatillugu iliuusissatut pilersaarusiornermik nassataqartussaq, aqqutigalugu paaserusutaanut ilaaginnarput.
Angallannerpaaffimmi biilit illoqarfimmi tulleriiaavinnavittarput, apeqqutaavorlu illoqarfiup qeqqaniit aqqutaasartut marluk pingatserlugit oqilisaasoqassanersoq, tassani eqqarsaatigineqarpoq Atlantikukkoortaatinut umiarsualivimmi nutaami suliffeqarfiit eqqaanniit umiarsualivitoqqamut ikaartarfiliortoqarsinnaanesoq
Periarfissaq alla eqqarsaatigineqartussaq tassaavoq, bussit taxarlu kisimik aqqutigisinnaasaannik immikkut aqquserniortoqassanersoq. Tassani siunertarinqarpoq, biilertartut angallannermi tulleriiaarlutik issiasarnermut sanilliullugu bussinut sukkanerusumik apuussinnaasunut ilaatinneqartalernissaat.
- Aammali apeqqutigissallugu pingaaruteqarpoq, aaqqiissutissatut pineqartut piujuartitsinermik tunngaveqarnersut. Ataatsimoortumik angallassisarnissaq pimoorunnerullugu anguniarneqarsinnaavoq, taamaalilluta ulluinnarni sivikitsukullammik angallattoqarpallaartarneranik ajornartorsiutaasartoq aaqqiiffiginiarlugu aningaasarpassuit aqquserniornermut atussanngikkaluarpavut, pilersaarusiornermi pisortaq Bilo Høegh Stigsen angallannermi iliuusissatut pilersaarusiornissat pillugit oqarpoq.
Akeqanngitsumik bussertarsinnaaneq?
Pilersaarusiornermut pisortap oqaatigaa, nunani allani soqutiginarluinnartunik suliniuteqartoqarsimasoq isumassarsiorfiusinnaasunik.
- Illoqarfeqarpoq illoqarfiup qeqqani biilerfigeqqusaanngitsunik. Allani akeqanngitsumik ataatsimoortumik angallassisoqartarpoq. Aap, periarfissarpassuaqarpoq ineriartortitsinermut sunniuteqarsinnaasunik, pilersaarusiornermi pisortaq oqarpoq.
Pilersaarutaavoq soqutigisallit allat, soorlu taxartartut bussinillu ingerlatseqatigiiffik angallannermi iliuusissatut pilersaarusiornermut peqataatinneqarnissaat, pilersaarusiorneq kommunalbestyrelsi isummersinnaaqqullugu ukiup tulliata ingerlanerani naammassineqareersimassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...