Pikialasorsuaq pillugu Isumalioqatigiissitap inassuteqaatai atuutsinneqalissapput
Oceans North Kalaallit Nunaat aamma ICC Greenland Pikialasorsuaq pillugu Isumalioqatigiissitap inassuteqaataasa atuutsinneqalernissaat qulakkeerniarlugu suleqatigeeqqilersimapput.
Pikialasorsuaq pillugu Isumalioqatigiissitap inassuteqaataasa Nunatsinni naalakkersuinikkut akuerineqarlutik piviusunngortinneqassapput.
ICC Greenlandimit aamma Ocean North Kalaallit Nunaannit isumalioqatigiissitap inassuteqaataanik atuutsitsilernissaq anguniarlugu aamma inassuteqaatit politikkerinit tusaaneqarlutillu pimoorunneqarnissaat siunertaralugu suleaqatigiilertunit oqaatigineqarpoq.
Atuutsinneqalernissaat piffisssanngorpoq, ICC Greenlandimi præsidenti Kuup Kleist polikkerinut - minnerunngitsumillu Naalakkersuisunut taamatut piumasaqarniartyoq oqarpoq.
Siunertaq ataaseq
Oceans North Kalaallit Nunaat aamma ICC Greenland siusinnerusukkut suleqatigiittarsimapput. Isumalioqatigiissitap suliaqarneranut atatillugu 2016-imi ukiullu tulliini suleqatigiissimallutik.
ICC Greenlandip Pikialasorsuaq pillugu Isumalioqatigiissitap nalunaarusiaa kingulleq "kikkunnullu tamanaut" inassuteqaatai tunniummagit suleqatigiinneq unitsikkallarneqarsimavoq. Kuupik Kleist taamatut nassuiaavoq.
- Suliaq aningaasaliissutitaqanngitsumik suliarisimavara. Taamaammat Ocean North Greenland suleqatigiinnitsinnik aallartitseqqukusummat soorunami akuersaarsimavugut.
Kuupik Kleistip ikiuukkusuttoqarnera nuannaarutigaa - pingaartuik aningaasaliissuteqartoqarniarnera pissutigalugu, aammali nukiit arlallit siunertamut ataatsimut atorneqartarnerat pitsaasuujuaannarmat.
Qaanaamut qaaqquneqarsimasut
ICC Greenlandimi præsidentip ilisimatitsissutigaa, Naalakkersuisut Canadamilu naalakkersuisut isumalioqatigiissitap inassuteqaataasa ilaannik atuutsitsilernissaq sulissutigigaat.
- Isumaqatigiissutissamut missingiussap immikkuualuttortai ilisimanngilakka, inassuteqaativulli tunngaviatigut isumaqatigisimavaat.
Nunalerinermut, Imminut Pilersornermut, Nukissiuuteqarnermut Avatangiisinullu Naalakkersuisup Kalistat Lundip ICC Greenland aamma Oceans North Kalaallit Nunaat Pikialasorsuaq pillugu oqaloqatigiinnissaq anguniarlugu Qaanaamut Qaanaallu nunaqarfiinut qaaqqusimavai.
-Aqutsiveqarfinnut nunalluunniit killeqarfiinut, piniagassanik killilersuinissamut, angallannissamut assigisaannullu atatillugit aalajangiissuteqarnissamut pisortatigoortumik piginnaatitaanngilagut, ICC Greenlandimi præsidenti oqarpoq:
- Suliassaq tamanna oqartussanit isumagineqartariaqarpoq.
Inuit-ledet forvaltning
ICC Greenland aamma Oceans North Kalaallit Nunaat naapertorlugit - Pikialasorsuaq pillugu Isumalioqatigiissitap inassuteqaatai sisamaapput.
Siullertut inassutigineqarpoq, Inuit Pikialasorsuup eqqaamiuinik siuttuuffigineqartumik aqutsiveqarfimmik pilersitsisoqassasoq, Inuit Aqutsinermi Oqartussaaffiat. Oqartussaqarfiup sammisat assigiinngitsut soorlu assartuineq, umiartorneq, sinerissallu avataani suliffissuaqarneq aqunneqarnissaat sinaakkusissavaa.
Aamma inassutigineqarpoq, Pikialasorsuarmi piujuartitsinissaq pineqartillugu Inuit peqataatinneqartanissaat. Inuit aamma Pikialasorsuarmi kiffaanngissuseqarlutik killeqanngitsumillu angalasinnaassapput.
Inuit aamma imartamik aqutsinermut peqataatinneqassapput.
- Oqartussaaqataanerup aqqani isumaqarpugut, inunnut tunngasunik - matumani Pikialasorsuup eqqaani najugaqartunut tunngasunik suliaqartoqartillugu, Canadami Kalaallillu Nunaanni najugaqartut peqataatinneqartassapput, Kuupik Kleist oqarpoq.