aningaasaliissutit inissipput
Piiaaffik nutaaq aallartingajalerpoq
Hudson Resources oqaluttuarpoq naatsorsuutigalugu anorthosit-imik piiaaffik 2016-imi aallartissallugu
Aasaru ukiaruluunniit Hudson Greenlandip Qaqortorsuarmi, Kangerlussuarmit ungasinngitsumi, piiaaffissaani ingerlatsinerit annertusineqassapput.
Canadamiut selskabiata naatsorsuutigaa tassani anorthositimik piiaanissani, aatsitassarlu taanna ilaatigut glasfiberimik sananermut atorneqartarpoq.
– Ataatsimut aningaasaliissutissanit 28 millioner euro-t missaannittunit 14 millioner euro-nik taarsigassarsinissamik European Investment Bankimik Hudson mandate letter-imik atsiugaqarsimavoq, Hudson Greenlandip siulittaasua Flemming Knudsen Aalborgimi attaveqaqatigiit ataatsimiinneranni oqarpoq.
Mandate letterikkut taarsigassarsiat isumaqatiginniutigineqarnerisa naammassinissaannut sinaakkutassat aalajangersarneqartarput, ingerlatsiviullu naatsorsuutigaa taanna qanittukkut inissinneqarumaartoq.
Ukioq manna aallartinniarpoq
– Tamanna tunuliaqutaralugu naatsorsuutigaarput Kangerlussuup eqqaani anorthosit-imik piiaaneq ukioq manna aallartereersinnaassallutigu, Knudsen oqarpoq, taannalu Arctic Business Networkip aatsitassanut gruppiani, aaqqissuussinermik ingerlatsisumi, siulittasuuvoq.
Taamatut nalunaaruteqartoqarpoq Kalaallit Nunaanni aatsitassarsiornermi nutaarsiassap angisuup isumalluarnartup nalunaarutigineqarnerata kinguninngua, tassanilu aamma selskabi canadameersoq pineqarpoq.
Naartsorsuutigineqarpoq suliniummi Qaqortorsuarmi sanaartorneq ukiup ataatsip missaanik sivisussuseqassasoq, naatsorsuutigineqarporlu tassani sulisut 20-ussasut, affaata missaaniittut nunaqavissuussallutik.
Nutaarsiassaq nutarterneqarsimavoq, taamaasilluni ersarinnerulerluni Hudson Resources EU-p aningaaserivianit taarsigassarsinissamik aallarniutaasumik akuerineqaannarsimasoq