Piginneqatigiit ukiuni pingasuni iluatsitsilluartumik ingerlatsereerlutik avissaalersut
Piginneqatigiit Michael Binzerip Christian Keldsenillu siunnersuisarfik Visiobox ApS niuernikkut iluatsilluartumik ingerlatereerlukku, Christian Keldsen Kalaallit Nunaanni Sulisitsiuni novemberip aallaqqaataani pisortanngorpat ataatsimoorunnaassapput
Michael Binzerip Christian Keldsenillu 2017-imi februaarip 17-iani VisioBox pilersippaat, naatsorsuusiaminnillu siullerpaamik saqqummiussigamik akileraarutit peereerlugit 1,3 millioner koruuninik sinneqartooruteqarsimallutik. Ukioq taanna decemberip qaammataani Inaluk Malene Brandt piginneqatigiiffimmi piginneqataalerpoq, taassumalu siunnersuisarfiup siunissaa imatut nassuaateqarfigaa:
Allanik piginneqateqalissanngitsut
- Pilersaarutaavoq, Christian Keldsen piginneqatigiiffimmi piginneqataajunnaarpat, VisioBox ApS Michaelimit uannillu ingerlateqqinneqarnissaa, Inaluk Brandt Sermitsiaq.AG-mut ilisimatitsivoq.
- Piginneqatigiinnut allamik ilaasoqalernissaa maannakkorpiaq pilersaaruteqarfiginngilarput, Inaluk Brandt oqarpoq.
Taassuma oqaluttuaraa, Christian Keldsen immikkut ittumik misissueqqissaarnissamik neqerooruteqarsinnaasoq, suliassaqarfillu taanna unitsikkallarneqassasoq, piginnittut allat taamatut piginnaasaqanngimmata.
- Maannakkorpiaq ulapippugut ukiorlu naallugu suliassaqarluta. Pisariaqartitsisoqarnerani siunnersortinik allanik suleqatissarsiortassaagut suleqatigiinnissamillu isumaqatigiissusiortarluta, siusinnerusukkummi immikkut ittumik suliassaqartilluta taamaaliortareerpugut, Inaluk Brandt nassuiaavoq.
Naatsorsuutit ajunngilluinnartut
Corona ajornartorsiortitsigaluartoq VisioBox ajornartorsiornermit aniguisimavoq, ukiorlu naallugu suliassaqarluarluni, Inaluk Brandt qulakkeerivoq. Suliassat tassaasut ingerlatsinermik ineriartortitsineq, aqutsineq, periusissiorneq suliffeqarfimmilu pissutsit VisioBoximi piginnittunitt qitiutillugit suliarineqartarput.
Visiobox ukiuni marluni atuutereerluni, akileraarutit peereerlugit 1,3 millioner koruunit sinnilaarlugit sinneqartooruteqarsimavoq, 2019-imili naatsorsuutit 412.00 koruuninut appariangaatsiarsimapput. Piginneqatigiiffiup atuunnerani piginnittut pingasut taakku 1,3 millioner koruuniniit to millioner koruunit sinnerlugit aningaasarsiaqartarsimapput, tamatummungalu peqatigitillugu ingerlatseqatigiiffiup iluanaarutaanit pissarsisinnaasarsimallutik.