Piginneqataassutsinik tunisineq siusinnerpaamik 2019-imi piariissaaq
Naalagaaffiup aamma SAS-ip Air Greenlandimi piginneqataassutaanik tunniussineq siusinnerpaamik ukiumi nutaami pissaaq, ilisimasallit arlallit taama naqissusiipput.
Danskit naalagaaffiata Ilulissani aamma Nuummi mittarfissanut nutaanut Kalaallit Airports aqqutigalugu piginneqataanermikkut ilanngunneranni qanoq pilersaarnermik nalunaarummi naqissuserneqarpoq, danskit Air Greenlandimi piginneqataassutaat Namminersorlutik Oqartussat oqartussat pisiarissagaat.
SAS aamma piginneqataavoq, ukiorpassuarnilu Air Greenlandimi piginneqataassutitik tunerusuttarpaat, piginnittuusullu tamarmik pingasuusut pilersaarummut akuersaarlutik nalunaarutigereerpaat, taanna Kim Kielsenimit aamma Lars Løkke Rasmussenimit ukiassariartulernerani atsiorneqarpoq, tamarmillu immikkut taakku inatsisartuini akuerineqaqqaassapput.
Akia ilisimaneqanngitsoq
Namminersorlutik Oqartussat timmisartortitseqatigiiffimmik tamakkiisumik piginnittunngornissaat qanoq akeqarumaarnersoq suli ilisimaneqanngilaq.
Naalagaaffiup SAS peqatigalugu Kammeradvokat aktianik tunisinissamut suliami ilanngussimagaat, danskit atorfilittaqarfianni paasisimasaqarluartoq ilisimatitsivoq, illuanik aamma Namminersorlutik Oqartussat nammineq suliami siunnersortinik suliaqartitsipput, tassani timmisartortitseqatigiiffiup maanna qanoq inissisimaneranik annertuumik, teknikkikkut, inatsiseqarnikkut aamma aningaasaqarnikkut suliarinnittoqassaaq, tamanna qanoq naleqarneranik aalajangiinermut tunngavissiissaaq.
Akia ukiormanna nassuiaaserneqarnissaa naatsorsuutigineqarpoq, kisianni unammilleqatiinnermut oqartussaaffiit aamma ilanngunneqassapput, taakkulu tunisinermut akuersisussaapput.
Aningaasaqarnermut ataatsimiititaliaq akuersisuussaaq
Inaarutaasumik tunisineq/pisineq aatsaat ukiumi nutaami pisinnaaneranik tamanna isumaqarpoq. Immaqa ukiumi nutaami aatsaaat pissaaq, tassanngaannaq ‘’aqqutaani aporfeqartoqariasaanngippat’’, tusarfik taama oqarpoq.
Naalakkersuisut isumaqatigiissummut isummissapput, tamatuma kingorna Aningaasaqarnermut Akileraartarnermut ataatsimiititaliamut akuersisussamut ingerlateqqinneqassaaq.