Piffissat nutaat – telefonit nutaat
Tusassip nalinginnaasumik telefoneqarneq ukioq manna atorunnaartinniarpaa. Nassuiaatigineqarpoq, telefoninut nalingissaasunut teknologiip tunngavigisaanut atorneqartartut kongoraartissaannik pissarsisoqarsinnaajunnaarsimanera.
Ukiup 2022-ip ingerlanerani telefonit nalinginnaasut kingulliit nunami maani atorunnaassavavut. Tusass aalajangersimavoq, telefoninut 1929-mili atuussimasunut attaveqaatit tamarmiusut matuneqassasut.
Qanga sianeraanni minutsit kisinneqartarput, qaammaammut minutsit qassit oqaluussisimanermut akigititat apeqqutaasarmata
Taamaammat telefonimut nalinginnaasumut teknologii telefoneqarnerlu amerlasuunit ”Minutmaskinamik” taagorneqartarpoq.
2022-mi teknologii telefonimut nalinginnaasumoortoq telefoneqarnerlu nutaanngilivallaarsimalissapput. Tassa nunarsuarmi tamarmi teknologiimut tassunga kingoraartissanik sanaartortueruppoq, taamaattumillu aserfallatsaaliuisoqarsinnaajunnaarluni, nunallu tamarmik nalinginnaasumik telefoneqartitsisut atorunnaarsitsisussanngorput.
Nalinginnaasumik telefonillit 1200-innanngorsimasut
Tamanna Nunatsinni massakkut pisussanngorpoq, Tusassillu periarfissat nutaat suliffeqarfiutilinnut innuttaasunullu neqeroorutigissavai nalunaarutigalugu nalinginnaasumik telefoneqarneq 2022-mi taamaatittariaqassagipput.
Tusass nalinginnaasumik telefonilinnik katillugit 1.198-inik mobiltelefonilinnillu 59.000-inik amerlanerusunik sullitaqarpoq.
Sullitat 5.704-sut ukiuni kingullerni telefonitoqqatik mobiltelefoninik taarsersimavaat.
- Tamanna pillugu minutmaskiinap mobilini nioqqutitsinni tamani killeqanngitsumik oqaluussaqarsinnaanermik taarserneqarnissaa Tusassimi sulissutigissavarput, tamannalu iluatsillugu aamma sullitatsinnut periarfissat pitsaanerusut neqeroorutigissallugit, Tusass-imi pisortaaneq Kristian Reinert Davidsen Sermitsiaq.AG-mut oqarpoq.
Sullitanut sulisunullu piffissat nutaat
Pisortap oqaatigaa, piffissat nutaat naleqqussaaffiusariaqartut, neriorsuutigaalu sullitanut sulisunullu sapinngisamik ajunnginnerpaamik kinguneqartussamik tamanna suliarineqassasoq.
- Sullitatta telefonit nalinginnaasut ukiorpassuarni kinguaariaallu arlallit nuannarisimavaat. Teknologi nutaaq tamatta sungiunniartussaavarput, soorunami Tusass-imi suleqatitta tamanna suliarisussaavaat, taakkumi telefonit nalinginnaasut ukiorpassuarni suliarisarsimavaat, aamma sulitatsinnut telefonimik nalinginnaasumik atuisunut maanna sianeqattaarpugut, aaqqiissutissanik nutaanik neqeroorfiginiarlugit.