Piffissaq takornariaqarfiusoq suli annaaneqanngilaq
Nunatta takornariarfissatut ammaqqinneqarnissaanut akiuussusersuinerit aamma corona-pas pingaaruteqartuussapput.
Piffissaq takornariaqarfiunerpaasoq suli annaaneqanngilaq, kisianni Nunatta ammaqqinneqarnissaanut pilersaarusiornissaq nukinginnarpoq.
Jørgen Sølvsteen Nielsen, Topas Rejserimi siulersuisuni siulittaasoq taama isumaqarpoq, taanna ukiuni kingullerni nunatsinni takornariartitsinerup ineriartornissaanut annertuumik aningaasaliissuteqarpoq – ilaatigut World of Greenlandimi, Nuuk Water Taximi piginneqataanikkut, Qeqertarsuullu tunuani akunnittarfinnik arlalinnik Disko Linemilu piginnittuunermigut, aviisi Sermitsiaq allappoq.
Nunatta periarfissaa annertooq
– Nuna ammaqqeriarpat Kalaallit Nunaannut angalanissamut soqutiginninneq annertuvoq. Tamanna ersarissumik malugivarput – takornariallu amerlasuut Kalaallit Nunaata coronamik ajornartorsiornermik aniguilluarneranik tusagaqarnikuunerisa soqutiginninneq annikinnerulersinngilaa. Kalaallit Nunaanni pissutsit angalaffinnut annertuunut assersuutigalugu Asiamut sanilliukkaanni, takornariarpassuit Kalaallit Nunaat “ernumananngitsutut” isigaat.
– Topas Rejserimi Kalaallit Nunaat Vietnamilu angeqqatigiingajapput, kisianni maanna pissutsit taamaatsillugit ukioq manna Asiamut angalatitsinissatsinnik naatsorsuuteqanngilagut. Kalaallit Nunaata periarfissarujussuaraa, Jørgen Sølvsteen Nielsen Sermitsiamut oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: