Piffissaq naleqqulluinnartoq
Kulturikkut Illorsuarmi Katuami pisortanngortussap, 37-nik ukiullip Ivaaq Kriegelip, atorfimmut qinnuteqaatini tamanut isertuussimavaa. Maanna kulturikkut illorsuup ineriartortinnissaa qilanaaraa – ilaatigut neriniartarfimmi kalaaliminernik sassaalliuteqartalernikkut
Ivaaq Kriegel piffissami matumani sulinngifferqarpoq, kisiannili kulturikkut illorsuarmi Katuami pisortatut septembarip 1-ani sulilinnginnermini Ilinniarfissuarmi ilinniartitsisutut atorfini uterfigigallassallugu.
Aviisi AG taama allappoq.
- Imminut unammillerniarlunga atorfik qinnutigisimavara, oqarpoq.
- Katuamut pisortatut suliassaq qanoq kivissinnaassaneriga pissanngatigaara. Illup ineriartortitseqataaffiginissaa illumut eqqarsaatit nutaat eqqarsaatiginissaat qilanaarinerpaavakka. Nalunngilara illu ingerlalluartoq aamma pikkorissunik sulisoqartoq, taamaattumik tamanna ingerlateqqillugu suliaqassaagut, oqarpoq.
Ivaap Katuaq nalunngereerpaa. Inuusuttuulluni atorfinni assigiinngitsuni ukiuni tallimani sulisimavoq.
- Taamanimi inuusuppugut, taamaattumillu angalaqattaartarluta kælderimi soqarnersoq takusimallugu. Qalianut aamma majuartarpugut tassani takusassarsiorluta, taamaammat illu ilisimaarilluarpara, illariatsiarluni oqarpoq.
Soorunami piccolutut, kioskimi sulisutut saaffiginnittarfimmiutullu sulineq pisortatut sulinerup assiginngilaa, kisianni qinnuteqaatini allakkamiuk siuttunngussagaluaruni illup siunissaa qanoq takorloornerlugu takujuminaatsissimanngilaa.
Ilaatigut Katuaq neriniartarfimmi kalaaliminernik sassaalliuteqartalissasoq takorluugaraa.
Qinnuteqaataa toqqarneqartut ilagaat oqaloqatigiinnissamullu ingerlaqqissimalluni. Ernermi Manup arfineq-marlunnik ukioqalerluni inuuiani, 1. klassimi atuaqataasa aggernissaannut pilersaarutinik ulikkaartumi, tamatumalu peqatigisaanik aqaguani kaffillernissamut piareersartoqartussaalluni.
AG pulaarmat, pania Nina, aqaguani qulingiluanik ukioqalerluni inuuissiortussaavoq.
Aviisimi AG-mi atuarnerusinnaavutit. Aviisi uani pissarsiariuk:
