NunaMinerals
Piffissaq ingerlaannarnissamut unammillertitsivoq
Namminersorlutik Oqartussat Nunamineralsimut aningaasat 4,5 millioner koruunit taarsigassarsiamik taarserneqarnissaat nukingisaarutigisalerpaat
Piffissaq tuluup aningaasaliisartup Patrick Newmansip aatsitassarsiorfimmik Nunamineralsimik akiliisinnaajunnaarluni matuinnartariaqarsinnaasumut annaassiniarluni atugaa unammillertitsivoq.
Aatsitassarsiorfiup aningaasaqarnermigut ajornartorsiortup akiitsoqarfigisaasa ilagaat Namminersorlutik Oqartussat, taakkua Sermitsiap paasissutissat pissarsiarisai naapertorlugit aningaasat 4,5 millioner koruunit suliffeqarfimmut Inatsisartut aningaasaqarnermut ataatsimiisitaliaata novembarimi taarsigassiatut tunniunnissai, uterteqqullugit nukingisaarisalersimapput.
Suliffeqarfillu aningaasanut taarsigassarsiaminut maanakkorpiaq utertitsinissaminut periarfissaqanngimmat, alloriarnissaq tulliussaaq suliffeqarfiup akiliisinnaajunnaartutut nalunaarutigalugu piumasarinissaa.
Atuaruk: NunaMineralsimik annaassiniaralualersoq
Assit: Naalakkersuisut Nunaminerals pillugu siunnersuutaat itigartinneqarpoq
Piumasaqaatit pisortatigoortut naammassineqareerput
Aningaasat taarsigassarsiarineqartut kingusinnerpaamik januaarip 31-ani utertiinneqarsimasussaangaluarput. Tamatuma saniatigut taarsigassarsisitsinermut allagartap takutippaa ullut arfineq-marluk suli qaavatigut periarfissaasut.
Patrick Newmanip Nunamineralsimut nutaamik aningaasaliisoqarnissaa ujartorpaa, taamaaliornerminillu atatillugu Namminersorlutik Oqartussanut qaammatip uuma aallartinnerani tigusassuusinik siunnersuutinik tunniussaqarsimavoq.
Namminersorlutik Oqartussat aningaasanik taarsigassarsisitsinermik saniatigut aatsitassarsiorfimmi ataasiakkaatut piginneqatiginnissutinik pigisaqartut annersaraat.
Sermitsiaq normu 7-imi allappugut Namminersorlutik Oqartussat pigisanik agguaassisarnermut eqqartuussivimmut akiliisinnaajunnaarnermik februuarip 12-ani piumasaqarnissaat ilimagineqarpoq. Kisianni tassani naatsorsuinermi Namminersorlutik Oqartussat iluminni nukingisaarisanerminni suleriusaat naatsorsuutiginngittoorsimavarput, suliassanngortitsinissamut suleriutsimut sunniuteqarsinnaasoq. Sermitsiamit tamanna ajuusaarutigaarput.
Nunamineralsi pillugu allaaserisat allat uani atuakkit