Piffissaligaanngitsumik pineqaatissinneqarsimasunut tunissuteqartarneq atorunnaarsinneqartoq

Kalaallit Danmarkimi piffissaligaanngitsumik pineqaatissinneqarsimasut juullimi inuuissioraangamillu naalagaaffiup akiligaanik tunissutisisarnerat unitsinneqarpoq.

Danmarkimi inatsisinik atuutsitsinermut ministeri Nick Hækkerup Folketingimi Kalaallit Nunaannut tunngasutigut Ataatsimiititaliamut allakkamini ilisimatitsivoq.

Danskinut pineqaatissinneqarsimasunut tunissuteqartarnerup 2017-imi atorunnaarsinneqarneranut tamanna malitseqartitsineruvoq. Pinerluuteqarsimasunulli isumaginnittoqarfimmit erseqqissaatigineqarpoq, kalaallit Herstedvesterimi piffissaligaanngitsumik parnaarussaaqqasut juullimi inuuissionerminnilu pinerluuteqarsimasunut isumaginnittoqarfiup akiligaanik illersuisuminnit tunissuteqarfigineqarsinnaasut:

- Aqutsisoqarfimmit pineqaatissinneqarsimasumut ataatsimut ukiumut tapiissutit 300 koruuniupput, inatsisinik atuutsitsinermut ministeri ataatsimiititaliamut allapoq.

Tunissuteqartarneq immikkut pisinnaatitaaffittut atorunnaarsinneqartoq

Ministerip ilisimatitsissutigaa, kalaallit piffissaligaanngitsumik pineqaatissinneqarsimasut, Danmarkimi pineqaatissinneqarsimanerant oqilisaaffiginiarlugu immikkut pisinnaatitaaffilerneqarsimasut.

Matumani pineqarput kalaalilimerngit ilinniartitaanerlu, aamma maanna atorunnaarsinneqartumik tunissutisisarneq,:

- Tunissutisisarneq immikkut pisinnaatitaaffiit taakku ilaginngilaat, taamaammat Inatsisinik Atuutsitsinermut ministeeriaqarfiup aaqqissuussaq atorunnaarsinniarpaa, tassa danarmkimi parnaarussivinni tamani assigiimmik periuseqartoqarnissaa anguniarlugu, Kalaallit Nunaannut tunngasutigut Ataatsimiititaliamut allakkani atuarneqarsinnaavoq.