PET: Kalaallinut aalajangiisartunut paasiniaasartunit navianartorsiortitsineq
Ruslandimit Kinamiillu paasiniaasartunit Kalaallit Nunaannut navianartorsiortitsisoqartoq, PET-p nalilerpaa.
Russinit Kinamiuniillu paasiniaasartunit Savalimmiunut Kalaallit Nunaannullu navianartorsiortitsisoqarpoq.
Danmarkimi Politiets Efterretningstjeneste (PET) isertortumik paasiniaasoqarneratigut Danmarkimut, Savalimmiunut Kalaallit Nunaannullu navianartorsiortitsisoqarneranik ukiumoortumik nalunaarusiamini taama allaaserisaqarpoq.
Ukrainemi sorsunnerup naalagaaffiit Danmarkitut ittut pillugit Ruslandip paasissutissanik pisariaqartitsineranik annertunerulersitsisoq, paasiniaasartut aamma nalilerpaat.
Kalaallit Nunaannut Savalimmiunullu navianartorsiortitsineq PET-p nalunaarusiaani immikkut sammineqarput.
Navianartorsiortitsineq pingaartumik danskit, savalimmiormiut kalaallillu oqartussaannut aalajangiisartuinut, soorlu Naalakkersuisuni Inatsisartunilu politikerinut atorfilittanullu sammitinneqartoq, politiit paasiniaasartui allapput.
Attaveqaasersuutit pingaarutillit ilisimatusarfiillu
- Attaveqaasersuutinut pingaarutilinnut, suliffeqarfinnut ilisimatusarfinnullu aamma navianartorsiortitsisoqarsinnaavoq, pingaartumik taakku paasissutissanik politikkimut sakkutooqarnikkullu pissutsinik, attaveqaasersuutit pingaarutilinnut tunngasunik imaluunniit Kinamiut aningaasaliisinnaanerannut tunngasunik pissutsinik imaqartillugit, PET taama allappoq.
PET naapertorlugu russit paasiniaasartui ukiorpassuarni Danmarkimi nunanilu allani, pingaartumik USA-p Issittumi sakkutooqarnikkut piginnaasaat aamma suliaat pillugit soqutiginnipput.
Qalasersuarmi killigititat pillugit apeqqummut, Kalaallit Nunaata Issittumi Siunnersuisoqatigiinni suleqatigiinnermut periusaanut kiisalu Kalaallit Nunaata Ruslandimut pillaatitut killilersuinermut isummernerinut Rusland aamma paasissutissanik soqutiginnittoq, PET naliliivoq.
Naliliineq: Qinersineq sunniiniarnertaqanngitsumik ingerlanneqartoq
Kinamut tunngatillugu nuna siullermik Kalaallit Nunaanni aningaasaliinissamut niuernissamullu attuumassuteqartunik suliaqartoq, paasiniaasartut allapput.
- Kinamiut inuiaqatigiit tamarmiutillugit periuseqarnerisa Kinamiut suliaqartut namminersortut pisortallu ingerlataasa immikkoortinneqarnissaa ajornakusoortippaa, Kinamiullu namminersortut Kinami naalagaaffimmit aaqqissuussiffigineqarsinnaasut, Kinami paasiniaasartunit, nunap immikkoortuinut periusissanut imaluunniit paasiniaanermik siunertaqartunut tunngasunut aaqqissuunneqarsinnaasut, PET naliliivoq.
Apriilimi 2021-mi Inatsisartunut aamma Savalimmiuni decembarimi 2022-mi Lagtingimut qinersisoqarnerani naalagaaffinnit allanit sunniiniarnertaqanngitsumik ingerlatsisoqarsimanera, paasiniaasartut pitsaasutut nalilerpaat.