Peter Olsen naalakkersuisoqarfimmini pisortartaarpoq
Karsten Peter Jensen siorna Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi pisortatut tunuartoq, Nuka Kleemannip kingoraarpaa.
Naalakkersuisut Nuka Kleemann Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi pisortatut atorfinitsippaat, marlunngornermi tusagassiuutinut nalunaarummi taama ilisimatitsipput.
Karsten Peter Jensen ukiuni arfineq-pingasuni naalakkersuisoqarfimmi sulisimasoq, ukiullu marluk ukiullu affaani naalakkersuisoqarfimmi pisortatut atorfeqarsimasoq, Nuka Kleemannip kingoraarpaa.
Nuka Kleemann inuiaat kulturiannik oqaluttuarisaanerannillu Ilisimatusarfimmi ilinniarsimasuuvoq. Taanna ilinniartitaanerup iluani 1993-mit maannamut atorfeqartarpoq. Ilulissani Perorsaanermik Ilinniarfik 2005-mit maannamut pisortaaffigaa.
- Nuka Kleemann ilinniartitaanerup timersornerullu iluani ukiorpassuarni ilisimavarput. Taamaattumik taassuma susassaqarfimmi uanga Naalakkersuisuuffinni ilisimasai atorluagassaapput. Nuka Kleemannip pisortanngornera nuannaarutigaara, suleqatigilernissaalu qilanaareqalugu, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Peter Olsen oqarpoq.
Peqatigiiffilerinermik misilittagaqarluartoq
Nuka Kleemann Upernavimmeersuuvoq. Timersoqatigiit Kattuffianni 2003-mit siulittaasuuvoq, 1979-miillu peqatigiiffilerinermik misilittagarpoq.
- Atorfittaarnera nuannaarutigaara. Suliassat soqutigilluinnakkakka suliarisussaavakka. Suleqatissat naapinnissaat suleqatiginissaallu qilanaarnaqaaq. Atorfilittat peqatigalugit inuiaqatigiinnut pitsaanerpaamik naammassisaqarluta suliaqartarnissarput naatsorsuutigineqassaaq, Nuka Kleemann oqarpoq.
Nuka Kleemann 58-nik ukioqarpoq. Taanna juunip aallaqqaataani atorfittaamini sulilissaaq.