Peter Erik Thomsen toqukkut qimaguppoq

Peter Erik Thomsen sapaammi ualikkut kræfterluni toqukkut qimaguppoq. Arsummi 1949-mi inuusimavoq.

Peter Erik Thomsen pisortani atorfilittut sulinini peqatigiiffilerinermilu timersornermik erinarsoqatigiinnilu Qaqortumi tunniusimalluni suleqataasimanini pillugu arlaleriarluni nersornaaserneqartarsimavoq.

Qaniginerpaasatut ikinngutigisaasa ilaat tassaavoq borgmesteriusimasoq Simon Simonsen, arsaannerup nipilersornerullu iluani Peter Erik Thomsenimik suleqateqarsimasoq, kommunimilu ukiuni arfineq-pingasuni borgmesteriunermini ikinngumminut Peter Erik Thomsenimut upalungaarsimanermut pisortaasumut pisortaasimasoq.

- Peter Erik najukkami inuiaqatigiinni nuannarineqartorujussuusimavoq, ukiorpassuarni timersornerup arsaannerullu iluanni meeqqanik inuusuttunillu sullissisimanini pillugu, Simon Simonsen oqaluttuarpoq.

Aalajaatsoq ilungersuussilluartorlu

Ikinngutigiit taakkua marluk ilaatigut Kujataani isikkamik arsaannermik ilinniarfik, maanna nuna tamakkerlugu siammarsimasoq,1994-imi pilersissimavaat.

- Aalajaatsuuvoq neriorsuutigisamisullu iliuuseqartarsimalluni. Anguniakkaminik naammassinnittarpoq, Simon Simonsen ikinngunni pillugu oqarpoq.

Peter Erik Thomsen Ataqqinartorsuup Dronningip saqqarmiulittagaanik Hendes Majestæt Dronningens Fortjentsmedaljemik sølviusumik pisortani ukiut 40-t sinnerlugit aalajaalluni sulisimanini pillugu 2019-imi saqqarmiulerneqarpoq.

Juulimi 1978-imi taamani Nukissiorfiit ataanni sulilluni aallartissimavoq tassanilu sulisimalluni decembarimi 2012-imi Kommune Kujallermut nuunnissami tungaanut.

Ukiumi ilungersuussilluartoq

Kommune Kujalliup aamma Innovation South Greenlandip Ukiumi Ilungersuussilluartumut nersiornaasiuttagaanik januaarimi nersornaaserneqarpoq, ima tunngavilersuuteqartinneqartumik:

- Peter Erik Thomsen peqatigiiffilerinermi, pingaartumik timersornerup iluani, maligassiuilluartuusimavoq. Inoqatiminut ilumoortumik soqutiginnilluni eqeersimaarluni suliniuteqarsimavoq meeqqanut inuusuttunullu inuunermik pitsaasumik pilersitsiniarluni ineriartortitsiniarlunilu.

Peter Erik Thomsenip qimatarai nulii Pitsi Thomsen meeqqanilu tallimat, taakkunannga marluk siusinnerusukkut aapparisimasaminit.

Qaqortumi arfininngorpat ilisaassaaq.