Persuttaasimanerit pillugit suliat amerleriarujussuarnerat ernummatigineqartoq
Persuttaasimanerit nalunaarutigineqarsimasut ukiup siulianut sanilliulugu 33 procentimik qaffariarsimapput. Kalaallit Nunaanni Politiit 2019-imut Ukiumoortumik nalunaarusiaanni takuneqarsinnaavoq, nalunaarutiginninnerit 701-iniit 2019-imi 936-nut amerleriarsimasut
- Nunanut allanut sanilliulluta persuttaasoqarsimaneranut atatillugu suliassarpassuaqareeraluarluta, persuttaasarnerit amerleriarsimanerat ernumanarpoq – aamma meeqqanik innarliisarnerup politiinit ukkatarineqarnerulerneranik eqqortumillu nalunaarsuisarnissap sammineqarnerulerneranik pissuteqaraluarpalluunniit, politimesteri Bjørn Tegner Bay ukkiumoortumik nalunaarusiami aallaqqaasiinermi allappoq.
- Meeqqanut inuusuttunullu innarliinerit tassaagajuttarput, pinngitsaalilluni atoqateqarneq, kannguttaalliorneq allatigullu kinguaasiuutitigut meeqqamut iliuuseqarneq. Sutigut tamatigut nalunaarutiginninnerit ukiut siuliinut sanilliullugit amerleriarsimapput. Nalunaarutiginninnerit amerleriarsimanerat politiinit ajortuinnartut isigineqanngilaq, tassami tamaasa ataatsimut isigalugit innarliisarnerit amerleriarsimasutut isikkoqanngimmata. Tassa innarliisimanerit politiinut maanna nalunaarutigineqartartut amerlisimammata.
