Persuttaasimaneq pinngitsaaliisimanerlu pillugit suliareqqitassanngortitsineq aalajangiiffigineqartoq
Angut 28-nik ukiulik piffissaligaanngitsumik isertitsiviittussanngorlugu nunatsinni eqqartuussivimit pineqaatissinneqarsimavoq. Angut ilaatigut peqqarniitsumik persuttaasimasutu, pinngitsaalilluni atoqateqarsimasutut inunnullu arlalinnut sioorasaarisimasutut pisuutinneqarpoq.
Kalaallit Nunaanni Eqqartuussiviup suliaq sisamanngormat naammassivaa, suliaq eqartuussivimmit ullut sisamat sinnerlugit suliarineqarsimavoq.
Suliaq naammassillugu suliarineqarmat, angut 28-nik ukiulik piffissaligaanngitsumik isertitsivimmiittussanngorlugu pineqaatissinneqarpoq, tassa Sermersuup Eqqartuussiviani ukioq manna siusinnerusukkut pineqaatissiissut assigalugu. Angut Maniitsumeersuuvoq.
Angutip illersuisuatalu ukiuni pingasuni simasaniluunniit isertitsivimmiittussanngorlugu pineqaatississiissut Nunatta Eqqartuussivianut suliareqqitassanngortissimavaat, aamma angutip unnerluussutit ilaannut pinngitsuunerarnera pissutigalugu.
Inunnut arlalinnut sioorasaarisimasutut pineqaatisssinneqartoq
Taamatulli oqarsimaneq Nunatsinni Eqqartuussivimmit isumaqatigineqanngilaq:
- Angut pisimasuni 20-ni tamani Nunatsinni Eqqartuussivimmit pisuutinneqarsimavoq, – taakkununnga ilanngullugit peqqarniitsumik persuttaasimasutut, inunnut arlalinnut sioorasaarisimasutut aamma meeqqanut kinguaassiuutitigut innarliisimasutut pisuutinneqarpoq, Kalaallit Nunaanni Politiit tusagassiorfinnut nalunaaruteqarnemi allapput.
- Nunatsinni Eqqartuussiviup aalajangersimavaa anguttip unnerluussutini 20-ni tamani pisuusutut najukkami eqqartuussivimmit pineqaatissinneqarsimanera atuutsiinnarneqassasoq. Kannguttaatsuliorsimanermulli atatillugu pissutsit ilaanni pinngitsuutinneqarpoq, politiit ilisimatitsipput.
Unnerluussutigineqartuni arlalinni angut inunnut persuttaasimasutut kiisalu inunnut pisortani sulisunut persuttaasimasutut pisuutinneqarluni pineqaatissinneqarpoq.
15-inik ukiulimmik pinngitsaaliisimasoq
- Angut arlaleriarluni niviarsiaqqamik 15-inik ukiulimmik pinngitsaaliilluni atoqateqartarsimasutut pinngitsaaleeriartarsimasutullu eqqartuussivimmit pineqaatissinneqarpoq. Nunatsinni Eqqartuussivimmit pingaartinneqarsimavoq, unnerluutigineqartup niviarsiaqqamut sioorasaarissarsimanera, niviarsararlu atoqateqarusunngikkaangat persuttarnissaanik akulikitsumik sioorasaarisarsimanera, politiit allapput.
28-nik ukiulik aamma niviarsiaqqamik allamik, taamanikkut 13-iinnarnik ukioqartumik atoqateqarsimasutut pineqaatissinneqarpoq.
Unnerluussisutut fuldmægtigi Emil Maegaard-Hoffmann politiit sinnerlugit suliamik ingerlatsisuusoq oqarpoq:
- Suliaq inuppassuarnut annertuumik kingunerluuteqarsimavoq, ilaatigut meeqqanut angimmit nuanniittoorujussuarmik pineqarsimasunut. Taamaammat taakku sinnerlugit nuannaarutigaara, suliaq maanna naammassillugu suliarineqarmat, unnerluussisoq oqarpoq.
Niviarsiaqqap ilaqutai sioorasaarsimagai
Angutip pineqartup tigummigallarneqarnermini niviarsiaqqamut taamanikkut 15-iinnarnik ukioqartumut sioorasaarisarnermi saniatigut, niviarsiaqqap ilaqutai inuillu allat oqaatsitigut oqarasuaatitigullu aamma sioorasaartarsimavai.
- Angutip piumasani pinngikkunigit inunnut assigiinngitsunut unataaniarluni, aamma inuit allat susassarinngisaannik saqqummiussiniarluni sioorasaarisarsimasutut pissutsini arfineq-marlunni pineqaatissinneqarpoq, Kalaallit Nunaanni Politiit allapput.