meeqqat inuusuttullu
Persuttaasarneq pillugu sulisunik ilinniartitsineq
Isumaginninnermut, ilaqutariinnermut, naligiissitaanermut inatsisinillu atuutsitsinermut naalakkersuisoqarfiup 2017-imi immikkut isumaginninnermut peqqissaanermullu tunngassuteqartuni sulianik ilinniagaqarsimasunik ilinniagaqartunillu ilinniartitsinerit aallartittussaavai
Pisortani sulisut persuttaasarneq pillugu suliani sumiissusersiuisarlutik akuliuttarlutillu pitsaanerusumik suleqatigiilissapput.
Tassami isumaginninnermut, ilaqutariinnermut, naligiissitaanermut inatsisinillu atuutsitsinermut naalakkersuisoqarfiup immikkut isumaginninnermut peqqissaanermullu tunngassuteqartuni sulianik ilinniagaqarsimasunik ilinniagaqartunillu ilinniartitsinerit aallartittussaavai.
Ilinniartitsinikkut siunertaavoq meeqqat angerlarsimaffinni nakuuserfiusartuni alliartortarnissaasa nakuusernerullu malitsigisaanik atugaqarlutik inuusariaqartarnerisa pinaveersaartinneqarnissaannut suliamik ilinniagaqarsimasut piginnaanngorsartinneqarnissaat.
Atuaruk: Meeqqanut inuusuttunullu atornerluinermut naaggaarneq
Suliamut atortussat
- Persuttaasarnerup akiorneqarnera inuiaqatigiit akisussaaffigaat uagullu inuiaqatigiittut ajornartorsiummut iliuuseqartussaavugut. Persuttarneqartartunut pisariaqartinneqartumik ikiorsiisarnissamut persuttaasarnerullu ingerlaartuarnerata unitsinneqarnissaanut siusissukkut sunillu suliaqarneq apeqqutaatinnagu sulissutiginnittarnerit pingaarutilerujussuupput. Taamaammat pingaaruteqarpoq sulianik ilinniagaqarsimasut persuttaasarneq pillugu suliani iliuuseqartarnissaminnut ilisimasaqarnissaat suliamullu tunngasunik atortussaqartarnissaat, isumaginninnermut naalakkersuisoq Sara Olsvig, tusagassiuutinut nalunaarummi oqarpoq.
Ilinniartitsinerit Naalakkersuisut 2014-2017-imi persuttaasarnermut ilioriusissaasa iliuuserineqartussanullu pilersaarutaasa atuutsinneqalernissaannut ilaapput ilinniartitsiniarlunilu sulissutigineqartunik allanik soorlu Suliniut Kattunnermik, qimarnguinni misilittakkanik paarlaasseqatigiittarnikkut aamma nammineq piumassutsiminnik sulisunik piginnaanngorsaanikkut aapparisanik annersaasarnermut akiuiniarnerup nukittorsarneqarnissaanik siunertaqartunik ingerlatitseqqinnerullutik.
Atuaruk: Nakuusertartut maanna katsorsarneqarsinnaalissapput
Illoqarfiit ilinniarfiit marluk
Namminersorlutik Oqartussat naapertorlugit ilinniartitsinerit siullermik Nuummi Ilulissanilu pissapput, ilinniartitsisunngorniat, peqqissaasunngorniat inunnillu isumaginnittunngorniat taamatullu Inunnik Isumaginninnermut Ilinniarfik allallu tassaniimmata.
Ilinniartut siulliit marsip 29-anni Nuummi aallartissapput.