Persuttaasarneq innuttaasullu toqqissiviilliornerat akiorniarlugu borgmesteri oqariartuuteqarpoq
Persuttaasunik siorasaarisunilluunniit innuttaasut ilisimasallit pinngitsooratik tamatigut politiinut unnerluutiginnittarnissaat Qeqqata Kommuniata kajumissaarutigaa.
Sisimiuni persuttaasarneq innuttaasut akornanni toqqissisimanngititsivoq, Qeqqata Kommuniani borgmester Malik Berthelsen oqarpoq
- Ajoraluartumik piffissami sivitsortumi Sisimiuni kattussilluni inoqatinut persuttaasarneq innuttaasut akornganni toqqissisimanngitsitsillunilu illoqarfitsinnut annertuumik tusaamanerlutsitsivoq.
- Tamanna soorunami nunaqqataalluni assorujussuaq tujorminarpoq aammalu minnerpaamilluunniit akuerineqarsinaanani! Tassami innuttaasut kikkuugaluarunilluunniit nuannaarlutik, toqqissisimallutik, persuttarneqarnissaminnillu siooranatik illoqarfimmiissinnaasariaqarnerat tamatta illersortariaqarput, Malik Berthelsen tusagassiutinut nalunaarummi allappoq.
Persuttaasimasoqarneranik ilisimannittut politiinut unnerluutiginnittarnissaat kajumissaarutigaa:
Unnerluussisarnissamik kujumissaarut
- Taamaattumik innuttaasunut kaammattuutigerusuppara persuttaasunik siorasaarisunilluunniit ilisimasaqartillutik pinngitsooratik tamatigut politiinut unnerluutiginnittarnissaat.
- Tassami aatsaat taamaasiornitsigut eqqartuussivik aqqutigalugu innuttaasut taamaattut akornganiitikkunnaarnissaat angusinnaavarput, borgmesteri oqarpoq.
Borgmeterip kaammattuutaanut tapersersuillutik Kalaallit Nunaanni Politiit Sermitsiaq.AG-mut oqaatigaat.
Malik Berthelsenip ilisimatitsissutaanut tunngatillugu politiit suliamik misissuisut politiit ilisimatitsissutigaat. Suliamut tunngatillugu annertunerusumik oqaaseqarsinnaanatik oqaatigaat.
Periarfissanik amigaateqartoqartoq
18-t ataallugit ukiullit matoqqasumut pineqaatissiisarfinnut inissinneqartalernissaat neriuutigaa.
- Nassuerutigissavarput inuusuttut 18-it ataallugit ukiullit kommunimiit nakkutigisassanngorlugit eqqartuunneqaraangata qanoq iliuuserisinnaasagut killilerujussuummata, taamaattumik pitsaanerpaavoq inuusuttut taamatut inoqatiminnut ulorianartorsiortitsisartut mattusimasussanngorlugit pineqaatissinneqartarpata, borgmesteri oqarpoq, kaammattuuteqarlunilu:
- Inuiaqatigiittut nunatta avataaniit tusaamaneqaatigut nuanninngitsut nuannersumut sangutissagutsigit minnerunngitsumillu nammineq inuiaqatigiittut tamatta toqqissisimasumik inuuneqalissagutta, asanninnerup qanoq pingaaruteqartigineranik immitsinnut eqqaasillutalu misigitittassasugut. Taannaavormi toqqissisimasumik inuuneqarnissatsinnut pingaaruteqarnerpaaq.