Skip to main content

Persuttaasarneq akiorniarlugu katersuiniartut

Nanu Børnip siuttuuffigisaanik tallimanngornermi unnukkut katersuiniartoqassaaq

Angerlarsimaffinni persuttaasarnerup akiorniarnissaanut aningaasat atorneqassapput

Nipilersortartut tusaamasat kulturip illorsuani Katuami piareersimassapput angerlarsimaffinni persuttaasarneq akiorniarlugu katersuiniarneq nalunaaqutaq arfineq pingasuniit ingerlanneqalerpat.

Angerlarsimaffinni eqqissiviilliornerit politiit ulluinnarni suliaanni ilaalluinnarput akuttunngitsunillu politiit ornigukkaangamik paasisarpaat meeqqanik aamma najuuttoqartoq. Persuttaanerit meerarpassuit takusarpaat ilaatigullumi aamma persuttarneqartarlutik. Tamatuma paqumigineqarani oqallisiginissaa siunertaralugu suliniut ’Nilliasa’ ingerlavoq.

- Aningaasat katersorneqartut ilaatigut atorusuppagut plakatinik sanatitsinermut taakkunani takuneqarsinnaaniassammat persuttaanermik nalaataqarsimagaanni sumut saaffiginnittoqarsinnaanersoq. Ajoraluartumik allagartanik taama ittunik kommunini takussaasoqanngilaq, Krissie Berthelsen Winberg Nanu Børnimiit Sermitsiaq.AG-mut oqarpoq.

Julie Berthelsen

Katersuiniarneq Katuami pisussaq KNR-TV-kkut aallakaatinneqalerpat nipilersortoqassaaq aammalu persuttaasarnermut qanimut ilisimasaqartunik oqaloqateqartoqassalluni.

Erinarsortartut ilisimaneqarluartut soorlu Julie Berthelsen, Kimmernaq Kjeldsen aamma Nina Kreutzmann Jørgensen appisimaaqataassapput. Taamatuttaaq pissapput nipilersoqatigiit Nanook suliniummut tapersiillutik cd-mik Nilliasamik saqqummersitsisimasut aamma appikkumaarlutik.

Persuttaaneq qimallugu

Aamma ’Sofa Aappalaartoqassaaq’ tassani persuttaasarnermut ilisimasaqartunik oqaloqateqartoqassalluni. Katersuiniarnermilu anguniarneqartut ilagaat ajornartorsiutip eqqumaffigineqarnerulernissaa.

- Neriuppugut persuttaasarnerup akiorniarnerani saaffiginnittarfinnik pilersitsisoqarsinnaasoq. Tassani persuttagaasimasut saaffiginnissinnaassapput. Aammali persuttaasimasut saaffiginnissinnaapput taakkumi ingerlariaqqinnissamut pisariaqartitsisinnaapput imaassinnaallunilu meeraanermi misigisat pissutigalugit nammineq amma persuttaasalersimasut, Krissie Berthelsen Winberg oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER