Persuttaasarneq aamma nakuusernerit atorunnaarlugit
Tasiilami atuarfik atuartut atuanngitsuukulasarnerannik ilinniartitsisullu suliartunngitsuukulasarnerannik aaqqiissuteqarniarnermut nutaamik suliniuteqalerpoq, tassani qitiutinneqarpoq atuartut piginnaanera ajornartorsiutit pinnagit.
Ukiuni arfinilinni peqanngereerluni atuarfiup aqutsisua Jørn Holbech Tasiiliami atuarfimmut aggustimi 2020-mi uterpoq.
Aviisi AG taama allappoq.
Ukiuni arfinilinni atuarfik assigiinngitsunik arfinilinnik aqutsisoqarsimavoq, Jørn Holbechilu malillugu erseqqilluinnarpoq ajornerusumut allanngortoqarsimasoq nammineq atuarfimmik aqutsineq ingerlatarileqqikkamiuk.
- Atuarfimmik aqutsineq aamma immikkut sammivilimmik ingerlaveqarnissaq amigaataapput piffissami ingerlareersumi ukiuni arfinilinni assigiinngitsunik arfinilinnik atuarfimmik aqutsisoqarsimappat. Qularnanngitsumik tamarmik immikkut pitsaasumik suliniuteqartarsimassapput, kisianni erseqqilluinnarpoq ataannartumik aamma pædagogiskiusumik erseqqissumik sammiveqarneq amigaataasut, Jørn Holbech oqarpoq.
Persuttaasarneq aamma qunusaarisarneq
- Ukiuni arlalinni Aarhusimeereerlunga uterama ajoraluartumik misigaara atuartut atuanngitsoortartut aamma ilinniartitsisut suliartunngitsoortartut amerleriarsimasut, aamma atuartoqarpoq atuariartunngilluinnartartunik. Tamakku saniatigut arlalinnik atuartoqarpoq puffajasunik, tamatuma kinguneranik nukiit atorneqartarlutik aamma persuttaaneq persuttaanissamillu ilinniartitsisunut qunusaarineq atuarfimmi ulluinnarsiutaalersimallutik, ukiut arfinillit matuma siornatigut tamakku qaqutigoortumik pisarput, Jørn Holbech oqaluttuarpoq.
Nutaamik aallarniuteqarneq aallartinneqarpoq
Atuarfiup taamaammat nutaamik aallarniuteqarneq ingerlatilerpaa atuarfeqarnermik ingerlatsivimmit tapersersorneqartumik, suliniut Naasunnguaq, tassaasoq ajornartorsiutit annertuallaalinnginneranni aamma aaqqiagiinnginnerit atuartuusumut unamminartorsiortumut akornutaalerpallaartinnagit piumassuseqarluni meeqqanik naapitsisarnissaq.
Aviisimi AG-mi atuarnerusinnaavutit. Aviisi uani pissarsiariuk: