Perorsaasut tallimanngorpat akerliussutsimik takutitsilersut

Perorsaasut sulinerminni pitsaanerusunik atugassaqarusupput akissarsiaminnillu malunnaatilimmik qaffaasoqarnissanik takorusullutik.

Tallimanngorpat nalunaaqutaq 17.15-imiit akerliussutsimik takutitsinissaq aalajangiuppaat. Perorsaasut taakkulu tapersersortaat, akerliussutsimik takutitsisut Nuummiittut NPK-p allaffiata eqqaanit Namminersorlutik Oqartussat tungaannut ingerlaaqatigiissapput..

Facebookimi aaqqissuussamut atatillugu erseqqissarneqarpoq NPK-p perorsaasut akissarsiaannut tunngatillugu isumaqatiginninniarnerannut tapersersuilluni akerliussutsimik takutitsisoqassasoq.

- Ersarissarniakkatta ilagaat perorsaasut akissarsiaasa qanoq ilinniartitsisunut aamma inunnik isumaginninnermi siunnersortinut sanilliullugit annikinnerutigineri, ukiut kingulliit aqqaneq-marluk ullumikkumut takutippaat 90.000 kr. angullugit nikingassutaasut, akerliussutsimik takutitsinissamut atatillugu nassuiaammi allanneqarsimavoq.

Sermitsiaq.AG-p paasisai malillugit Nuummi ingerlaaqatigiittoqarnissaata saniatigut, Qaqortumi aamma pilersaaruteqartoqartoq. Pilersaarutillu aallartisarneqartut Ilulissani Maniitsumilu.

Akissarsiakitsut

Perorsaasut akissarsiaat Namminersorlutik Oqartussat iluannit misissuiffigineqareernikuuvoq.

Sermitsiaq.AG-p allagaatinik takunnissinnaaneq atorlugu allagaatinik februarimi 2020-mi tigusaani atuarneqarsinnaavoq ilinniartitaanermut aqutsisoqarfiup "atorfiit ilinniaqqiffiusut assigiinngitsut akissarsiatigut nikinganeri misissuiffigisimagaat" NPK-p Namminersorlutillu Oqartussat akissarsianut isumaqatiginninniarnissaat sioqqullugu.

Atorfiit pineqartut tassaapput perorsaasut, peqqissaasut, ilinniartitsisut aamma isumaginninnermi siunnersortit, akissarsiatigut aallartiffiit, qaffasinnerpaaffiit agguaqatigiissinnerilu misissuiffigineqarsimallutik.

Misissuinerup takutippaa perorsaasut akissarsiaat aallartinnermi killigititamilu ilinniartitsisunut, isumaginninnermut siunnersortinut, peqqissaasunullu sanilliullugu 15,1 procentimik appasinnerusut. Perorsaasorlu ukiut 37-it atorfimminiiginnarsimaguni 15,3 procentimik appasinnerusumik akissarsiaqartassasoq.

Perorsaasut kaammattuipput perorsaasut illoqarfinni allani najugaqartut tallimanngorpat akerliussutsimik takutitseqataaqqullugit. Erseqqissarneqarpoq ingerlaaqatigiinneq eqqissisimasumik ingerlanneqassasoq.

Oqimaatsunik akisussaaffeqartut

Lily Mikaelsen Nuummi perorsaasuuvoq. Taanna Sermitsiaq.AG-mut oqaluttuarpoq perorsaasut suliamik saniatigut oqimaatsunik allanik nammataqartartut, suliffimmi akisussaaffigisaminnik. Sullitaminnut qaninnerpaamik inissisimasarput, sapinngisamillu meeqqap pitsaanerpaamik pineqarnissaa pillugu sullissisuusarlutik.

- Aamma perorsaasorpassuit uippakajaarnermik napparsimalersarput. Suliassatut nassuiarneqarsimasut saniatigut suli allanik oqimaatsunik kivitassaqartuaannarpugut. Taakku saniatigut sulisunik amigartuaannapajaartuni sulivugut, uagutsinnullu tamanna tuttarpoq. Perorsaasutut atorfiit pilerinarsarneqartariaqarput, Lily Mikaelsen oqarpoq.

- Aningaasaqarneq eqqarsaatigalugu qaammammut naammaqqatuttumik inuuniuteqakkajuppugut. Pisiassat akii inimullu akiligassaq qaffanneqakkajuttut, perorsaasut akissarsiaat suami qaffalaarneqartuarput. Nammanneqarsinnaanngilaq. Nalunngisaqarpunga perorsaasunik mikisuutilinnik. Meeqqatik napparsimasut angerlarsimaqatigisimariaraangamikkit, qaammammulluunniit akissarsiaminnik takunngitsuuittarput. Peqqinnanngilaq, aamma perorsaasut taama pineqarneri naleqartitsinnginneruvoq, oqarpoq.

Allaaserisap suliarinerani akerliussutsimik peqataajumasut soqutiginnittullu nalunaarsimasut katillugit 287-iusut takuneqarsinnaavoq.

Sermitsiaq.AG-p aningaasaqarnermut naalakkersuisoq Vittus Qujaukitsoq akerliussutsimik takutitsisoqalernera pillugu oqaaseqartinniarlugu saaffigisimavaa. Naalakkersuisorli suli akissuteqanngilaq.