Perorsaasut akissarsiaat ilisimaneqanngillat
Demokraatineersup Nivi Olsenip perorsaasunik amigaateqarneq annikillisarusuppaa. Taamaammat apeqqut taannarpiaq pillugu Inatsisartuni oqallisissiamik ullumi saqqummiissaaq.
Nivi Olsenip (D) perorsaasut nunatta meerartaanik paaqqutarinninnerminni akissarsiaasa appasippallaarnerannik aaqqiissutissanik ujartuivoq. Akissarsiat qaffanneqanngippata perorsaasussaaleqisoqartuarnissaa taassuma ernummatigaa.
- Perorsaasunik amingaateqarneq allatut oqaatigalugu inuiaqatigiinni ajornartorsiutaavoq piviusoq allatut ajornartumik aaqqittariaqartoq innuttaasunut neqeroorutigisinnaajumallugu pikkorissunik paarsisoqarnissaq aamma meeqqerivinni meeqqanik ineriartortitsisinnaanissaq, Nivi Olsen (D) oqallisissiamini tunngavilersuilluni allappoq.
Perorsaasutut piukkunnaatilinnik sulisunik ilinniartitsinissaq, sulisussarsiortarnissaq sulisullu suliffimminni suliinnarnissaat annerusumik pingaartittariaqartuusut, Ilinniartitaanermut, kultooreqarnermut ilageeqarnermullu Naalakkersuisoq, Ane Lone Bagger (S) isumaqataalluni allappoq. Taassuma erseqqissaatigaa nunatsinni meeraaqqerivinni meeqqerivinnilu perorsaasut atugarisaat pillugit misissuinissamut iliuuseqarniarnerit aallartisarneqalereersut.
Akissarsiat qaffasissusiat paasineqanngilaq
- Naalakkersuisut "Ulluunerani paaqqinnittarfinni sulisunut periusissatut iliuusissatullu Pilersaarutaanni" perorsaasut akissarsiaasa allanik sulialinnut sanilliussilluni misissuiffigineqarnissaannik aallartitsisimammata, Ane Lone Bagger nangilluni allappoq.
Naalakkersuisut periusissiaat iliuusissatullu pilersaarutaat pineqartoq Sermitsiaq.AG-p tigummivaa. Tassani allassimavoq Ilinniartitaanermut Aqutsisoqarfimmit “Misissuinermut atatillugu Kalaallit Nunaanni perorsaasut akissarsiaat pillugit paasiniaalluta misilikkaluarparput. Siunertaavoq Kalaallit Nunaanni perorsaasut akissarsiaasa Nunani Avannarlerni allani perorsaasut akissarsiaannut sannilliunnissaat.”
- Kisianni Kalaallit Nunaanni akissarsiat qaffasissusiat pillugu paasisaqanngitsoorpugut, paasissutissaqarfiit naapertuuttut attavigisaraluarlugit, Naalakkersuisut periusissaat iliuusissatullu pilersaarutaannut tunngatillugu meeqqerivinnik misissuinermit nalunaarusiami allassimavoq.
Pingaaruteqarluinnartoq
Nunatsinni agguaqatigiissillugu perorsaasut 29-t Perorsaanermik Ilinniarfik illoqarfillu qimannagu perorsaasutut ilinniarnerit aqqutigalugit ilinniakkaminnik naammassinnittarput. Nivi Olsenilu (D) isumaqarpoq, perorsaasut ilinniarsimasut meeraaqqerivinniitinniarneqassappata arlalinnik suliniuteqartoqartariaqartoq.
- Demokraatinut pingaaruteqarluinnarpoq meeqqerivinni pissutsinik iluarsiinissaq sulisoqarneq, angajoqqaat minnerunngitsumillu meeqqat eqqarsaatigalugit, oqallilisissiamini tunngavilersuutitut ilaatigut allappoq.
Oqallisissiatut siunnersuut Inatsisartuni ullumi oqallisigineqassaaq.