Permagreen allannguinermigut sinneqartoortoq

Ukiuni marlunni annertuumik amigartooruteqareerluni nuanniitsumillu annaasaqareerluni Permagreen A/S kingumut sinneqartoorpoq.

Ukioq manna Permagreenip Nuummi sanaartugaasa pingaarnerit ilagaat naluttarfiup akiani Saarfaarsunni inissialiornermi Tårn 2 – 66-nik inissiaqartoq ukioq manna naammassisussaq.

Ukiuni marlunni amigartooruteqareerluni Kalaallit Nunaanni entreprenørit ingerlatseqatigiiffiat Permagreen amigartooruteqarunnaarpoq.

Aviisi Sermitsiaq taama allappoq.

Ingerlatseqatigiiffik 2019-imi akileraartinnani 9,6 million koruuninik sinneqartoorpoq, 2018-imi 7,9 million koruuninik amigartooruteqareerluni.

- Naammaginartumik angusaqarpugut, pisortaaneq Jeppe Steffensen oqarpoq.

2019-imi kaaviiaartitsineq 391 million koruuninut annertusivoq ukiup siuliani 302 million koruuniusumalluni. 2019-imi kaaviiaartitsineq taamaalilluni Permagreenip oqaluttuarisaanerani annertunerpaavoq.

Ukioq manna apriilip aallaqqaataani 32-nik ukiiullip Jeppe Steffensenip ukiorpanni suliffeqarfimmi pisortaanerusimasoq Preben Kold Larsen 64-inik ukioqartoq taarserpa.

Permagreenip 2019-imi sinneqartoorutaa aqutsisut ilimagisaannit akileraartinnani 1,5 million koruninik appasinneruvoq. Nassuiaatissaavoq ukiup kigaatsimik aallartissimanera, suliassat ingerlatseqatigiiffiup ilimagisaanit kigaannerusumik ineriartorsimammata. Aamma aningaasartuuteqarneruvoq suliffeqarfiup aningaasanik aqutseriaatsimut nutaamut nuussimaneranut atatillugu.

- Maajimiit ukiup naaneranut ilungersorsimaqaagut. Piffissap ilaani ilumut sanaartorsimaqaagut. Angusat kusanarluinnarput. Qujanartumillu 2020-mi pitsaasumik ingerlaannarpugut, Jeppe Steffensen oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS