Permagreen akilersuinermik unitsitsinermit eqqugaavallaanngitsoq
Permagreen Grønland, Nuummi parabolinik tigooraaveqarfissuarmik oktobarimili suliaqarsimasoq, nunat tamalaat akornanni qaammataasanik ingerlatseqatigiiffiup OneWebip akilersuinermik unitsitsinerata kingorna suliaminik unitsitsigallarpoq.
Coronap ajornartorsiortitsinerata qaammataasanik suliniut annertuumik anguniagaqarfiusoq akilersuinermik unitsitsisariaqalersissimavaa, sanaartornermik suliffeqarfimmit Permagreen Grønlandimit malugineqarsinnaasumik.
Ingerlatseqatigiiffik Londonimi aallaaveqartoq OneWeb qaammataasat 100-t arlallit, nunarsuarmi sumiikkaluaraanniluunniit internettimik sukkasoorujussuarmik kikkunnut tamanut qulakkeerinnittussat, igeriunneqarnissaasa aningaasalersornissaannut aningasaliissutinik nutaanik nassaarniarnermini ajornartorsiuteqarsimavoq. Nunarsuaq tamakkerlugu tigooraaviit digitalimik attaveqaatinik qulakkeerinnittussaagaluarput.
Nuummi parnaarussivittaap eqqaani antenneqarfimmik sanaartorneq Permagreen Grønlandip isumagisimavaa. Suliassat isumaqatigiissullu Norgemi ingerlatseqatigiiffimmut, Ksat-imut, Kongsberg Satellite Servicesimut, OneWebimik suliniummut akuusumut, atsioqatigiissutigineqarsimapput.
Suliaq unitsikkallarneqartoq
- Norgemiut Ksat-imeersut isumaqatigiissuteqarfigalugit antenneqarfimmik sanaartorneq unitsikkallarsimavarput. Neriuppugut OneWeb tunisaqassasoq imaluunniit aningaasaliissutissanik pisariaqartunik nassaassasoq, sulineq nangissinnaalerniassagatsigu, Permagreen Grønlandimi pisortaq, Jeppe Steffensen, Sermitsiaq.AG-mut paasissutissiivoq.
Jeppe Steffensen oqaluttuarpoq, Permagreen Grønland maannamut sulianut ingerlaavartumik akiliuteqarfigineqartarsimasoq. Suliassaq koruunik millioninik arlalinnik naleqarpoq. Sanaartornermik suliffeqarfik taamaalilluni suliniummut aningaasanik annaasaqanngilaq taamaalillunilu tamatuminnga ajutooruteqassanani.
- Ksat-imit suliamik unitsitseqquneqarnitta kinguninnguatigut iluatsitsilluta nutaamik suliassaqalersimavugut. Taamaalilluta atortunik sulisunillu nuussiinnarsinnaasimavugut, tunisassiornermillu kaaviiaartitanik attassiinnarsinnaasimalluta, Permagreenip pisortaa paasissutissiivoq.
Taassuma suliniutip aningaasalersuinikkut ajornartorsiulersimanera uggoraa.
- Antenneqarfiup naammassinissaa allaavoq. Suliassaq naammassisinnaassagipput soorunami neriuutigaarput. Qaammataasanik suliniutip uagut Kalaallit Nunaanni internettimik atuisuusugut iluaqutigisinnaasatsinnik periarfissiinissaa aamma allaavoq. Suliniummi pissanganartuuvoq, Jeppe Steffensen oqarpoq.
Toqqaviliorneq
Permagreen oktobarimiilli qaartiteringaatsiarsimavoq parabolersuillu kiisalu illutassap 30 kvadratmeterinik angissuseqartup toqqavissaannik sanaartorsimalluni. Permagreenip pilersaarutit naapertorlugu suliani aasartinnagu inaarsartussaagaluarpai.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...