perlerorneq
Perlerortoqarneranik mianersoqqussut taamaatinneqartoq
Nuup eqqaani Qallussuarmi terianniaq takuneqartoq perlerortuusimanngilaq, piaraqatigiiaalliukua.
Kommuneqarfik Sermersooq juulip 21-anni mianersoqqussummik nassiussaqarpoq, terianniaq sumiiffimmi takuneqarsimanerarlugu, perlerortuunissaalu ernummatigineqartoq. Tamanna pissutigalugu kommuni pullatilersorniarpoq, sumiiffimmilu terianniamik takusoqartillugu kommunimut sianertoqarnissaanik qinnuiginnippoq.
Arlallit terianniaq takusimavaat
- Inunnit terianniamik takunnissimasunit saaffigineqarpunga. Nalinginnaasumik qaasuttumik pissusilersunngimmat perlerortoorpasinngilaq, ingerlatsinermut aqutsisoq, Søren Christensen Sermitsiaq.AG-mut nassuiaavoq.
Tamannalu tunngavigalugu teriannissat peerneqarnissaannut suliniuteqarneq annikillisarneqartoq, taanna ilisimatitsivoq. Taamaattorli mittarfeqarfiup, Qallussuup aamma ikuallaaviup eqqaani pullatinik ilisisoqarsimavoq.
- Teriannissap pisullutik angalasut sumiiffiup aalajangersimasup tungaanuinnaq malittarai paasitinneqarpunga, piaqqani sumiiffimmiittut illersuinnarniarsimanissai ilimagaarput, Søren Christensen nassuiaavoq.
Teriannissat perlerortut qaasuttarput
Teriannissat perlerortut qaasuttumik pissusilersortarput. Perlerorneq qaratsap ameraasaatigut aseruuttoorneruvoq, tamannalu aamma inunnut ulorianartuuvoq.