Periusissiaq nutaaq: Royalty atuutiinnarneqassaaq

Aatsitassarsiorfiit aatsitassanut periusissaq nutaaq atuutsinneqalissappat royaltymutk maannamut annertussusilimmik suli akiliuteqartassapput.

Royalty isumaqarpoq, ingerlatseqatigiiffiit aatsitassanut qallukkaminnut, suliaqarnerminni sinneqartooruteqarunik sinneqartooruteqanngikkaluarunilluunniit akitsuummik akiliuteqatassasut.

Aatsitassarsiornermi royalty-mik aaqqissuussaq oqallissutaalluareerluni 2013-imi atuutsinneqalerpoq. Tunngavilersuutaasimapput, aatsitassat qallorneqarneranni avammullu nioqqutigineqarneranni Nunatta Karsiata isertitaqarnissaata qulakkeerneqarnissaa, aamma suliffeqarfiup iluanaarutiminik nunani allaniisitsilluni isertuussisinnaaneranik pinaveersaartitsinissaq. Akerliusut tunngavilersuutigisimavaat, ingerlatseqatigiiffik suli aningaasarsiulernani royaltymik akiliuteqartassappat suliniummik nutaamik aallartitsinissaq akisunipilussuanngussasoq.

Unammillersinnaassuseqarnissaq anguniarneqartoq

Naalakkersuisut aatsitassanut periusissiaq, aatsitassarsiorfinnik amerlanerusunik Nunatsinnukarusutsilersussaq tusarniaassutigalugu nassiuteqqammerpaat. Tassunga atatillugu akileraarutit royaltillu annertussusissaat aamma misissorneqarsimapput.

- Kalaallit Nunaata aatsitassarsiorluni suliaqarnermut aningaasaliiumalersitsiniarneq pillugu nunarsuaq tamakkerlugu unammilleqatigaa. Tunngavigisat aningaasaliisartut qiviartagaat tassaapput akileraarutinut aamma royaltynut periaaseq, periusissiassamut missingiummi taamatut allassimasoqarpoq.

Taamaammat nunanut allanut sanilliullugu Kalaallit Nunaata tamatumani qanoq inissisimanera misissorneqarsimavoq. Allannguisoqartariaqanngitsorlu inerniliunneqarsimalluni.

- Misissueqqissaarnermi inerniliunneqarpoq, Kalaallit Nunaanni royaltynut akigititat sisamat taakkua annertussusaat, Kalaallit Nunaata unammillersinnaassuseqarnissaata aammalu aatsitassanik piiaanermit naleqquttumik isertitanik pissarsisarnissaata qulakkeernissaanut sanilliullugu, suli naleqquttut.

Royaltynut akigititat:

Aatsitassat qaqutigoortut: 5,0 %

Uran: 5,0 %

Ujaqqat pinnersaasiassat: 5,5 % (15 % sinneqartoorutit 40% sinnersimapassuk)

Saffiugassat aatsitassallu allat: 2,5 %