Periusissiaq nutaaq atuarfinnut pitsanngortitsissaaq

Ilinninniartitsisut piginnaasaannik ineriartortitsineq, atuartitsinermi IT-mik inerisaaneq kiisalu atugarissaaneq aqqutigalugu Avannaata Kommuniani atuarfiit ineriartortinneqassapput.

Avannaata kommuniani atuartitaanermut siullerpaamik periusissiaqalerpoq. Taanna assigiinngitsunik anguniagaqarfiussaaq, isumaqatigiissullu sisamanngormat atsiorneqarluni.

Tassa ilaatigut imaappoq suliassani naammassisassani quliusuni arfinillit ukkatarineqassasut. Uani Avannaata kommunia qulini naammasisassani qanoq suliarineqassanersut innissaat nammineq aalajangiiffigissavaa, tamanna ilinniarnermut allatoqarfik suleqatigalugu suliarineqassaaq, Avannaata Kommunia nittartakkamini allappoq.

- Suliap ingerlateqqinnissaanut qilanaarpugut, maannakkumut atuartitaanermut periusissiamik peqarnikuunngilagut, taamaattumik siunissami kommunimi meeqqaanut atuarfiutitsinni pitsannguutinik ersarissunik takusalernissarput neriuutigaarput, Avannaata Kommuniani atuartitaanermut pisortaq, Aka Grønvold oqarpoq.

Pitsaassutsimik qulakkeerinninneq

Atuartitaanermut periusissiami ukkatarineqartut arfinillit ukuupput:

Atuartitsinermi pitsaassutsimik qulakkeerinninneq – aqutsisut ilinniartitsisullu piginnaasaannik ineriartortitsineq – Atuartitsinermi IT-mik inerisaaneq – Immikkut atuartitsineq akuutitsinerlu – Inooqataasutut inuttullu atugarissaarneq – Suliaqarfiit akimorlugit suleqatigiinneq.

Cand.mag. Mette Larsen Lyberth aamma Ph.d. Mitdlarak Lennert atuartitaanermut periusissiaq pillugu Ilinniarnermut Allattoqarfik suleqatigalugu inerisarsimavaat.

Atuartitaanemut periusissiaq meeqqat atuarfiini atuutilernissamut piareeqqavoq, aamma atuarfiit naalagai tullersortaalu pikkorissartinneqareerput, suleriaqqinnissaminnullu atortussanik pissarsereerlutik.

Anguneqassapput

Atuartitaanermut periusissiaq 2022 ungasinnerusoq isigalugu meeqqat atuarfiani anguniagassanut tikkuussisuussaaq, aammalu atuarfinnik ataasiakkaanik naliliineq qaqugukkulluunniit pisinnaasassaaq.

Atuartitaanermut periusissiaq atuutilersikkatsigut nuannaaqaagut. Atuarfiup naalagaat aamma tullersortaat qanoq ukkatarisassat ataasiakkaat anguneqarnisaannut pikkorissartinnikuuavut, arlallillu atuartitaanermut periusissiamut attuumassusillit suleqatigilluarnikuullutigit, taama oqaluttuarpoq Aka Grønvold, Atuartitaanermut Allaattoqarfimmi pisortaq.

Kommunalbestyrelsep Atuartitaanermut Periusissiaq 2022 kommunalbestyrelse kingullermik ataatsimiimmat akuerivaa.

Powered by Labrador CMS