Periarfissaq nutaaq: Nakorsat immikkut ilisimasalittut ilinniarnertik tamaat Nuummi ingerlassinnaanngorpat
Nakorsat nalinginnaasumik nakorsaanermik immikkut ilisimasalittut ilinniartut, ilinniarnerup immikkoortuisa ilaat pikkorissaanerit, Danmarkimi ingerlanneqartaraluit maanna nunatsinni ingerlassinnaanngorpaat.
Nakorsatt nalinginnaasumik nakorsaanermit immikkut ilisimasalittut nakorsanngornissamut ilinniartunut pikkorissarnerit piumasaqaataasut arlallit peqqinnissaqarfiup maanna akisussaaffigilerpai. Maannamut pikkorissarnerit Danmarkimi taamaallaat ingerlanneqartarsimagaluarput.
Akisussaaffimmik tigusineq isumaqarpoq ilinniagaqarneq ukiunik tallimanik sivisussusilik nunatsinni naammassillugu ingerlanneqarsinnaalertoq.
Pikkorissarnerit Danmarkimi ingerlanneqartartunut assingupput, nunatsinnili pissutsinnut tulluarsarsimallutik, Peqqinnissaqarfik Sermersuumi nakorsaq, nunatsinnilu Peqqinnissaqarfimmi nalinginnaasumik nakorsaanermik immikkut ilisimasalittut ilinniartitaanermut akisussaasoq Gert Mulvad ilisimatitsivoq.
Nakorsat immikkut ilisimasallit nunatsinni pisariaqartitanik ilisimasaqarnerulernissaat taamaasiornikkut anguneqassaaq.
Nunatsinniinnerulissasut
Gert Mulvad naapertorlugu peqqinnissaqarfimmi nakorsat immikkut ilisimasalittut ilinniartut ilinniartitsisinnaalernissaminnut aamma pikkorissarneqassapput. Pikkorissarnerit nunatsinnut tulluarsagaassapput nunatsinni nakorsat ilinniarsimasut unammilligassanik pisariaqartitanillu ilisimasaqarneruniassammata.
Pikkorissarnerit sapaatip akunneranik sivisussuseqartarput. Syddansk Universitet (SDU) pikkorissaanernik ingerlatsisarpoq, ilinniagaqartullu ilinniartitsisalernissaannut akuersissutinik tunniussisarluni.
- Danmarkimi immikkut ilisimasaqarnermut tunngatillugu qanoq pisoqarneranik ilisimasaqartuarnissaq, nunatsinnilu pissutsinik ukkassinissaq suli pingaaruteqarpoq, Gert Mulvad oqarpoq.
Nangippoq:
- Nunatsinnut nuussineq nunatsinniinnerunermik- napparsimasunut iluaqutaasussamik kinguneqassaaq, nunatsinnilu pissutsinik ilinniartitsineq nakorsanut kingorna nunatsinni Peqqinnissaqarfimmi sulilersussanut pingaaruteqarluni.