Per Rosing: Kalaallit Nunaat erinagissorsuarmik annaasaqarpoq
Kalaallit Nunaat inummik, erinarsornermini asanninnermik tunisisartutut ilisarnaataasumik annaasaqarpoq, erinarsornermi aqutsisoq Per Rosing isumaqarpoq.
Kalaallip erinniarsuarnik erinarsortartup, Ida Heinrichip toqunera, nunatsinni tamanit tusarneqartutut akisuasutut ippoq. Ida Heinchip, taannaasimavoq, taannaavoq, taannaajuassaarlu Kalaallit Nunaanni erinarsornermik nipilersornermillu suliaqartunut maligassiuisoq, Per Rosing isumaqarpoq.
- Kalaallit takutippaatigut kalaallit aamma operamik erinarsorsinnaasut. Erinarsoraangami tunisisarsimaqaaq, Per Rosing Sermitsiaq.AG-mut oqarpoq.
Per Rosing nipilersornermi erinarsornermilu ilinniagaqartuuvoq, ukiorpassuarnilu nipilersornermik ilinniartitsisuusimalluni. Erinniortuuvoq erinarsornernilu aqutsisuusarluni. Ida Heinrich erinarsortalermat aamma ilinniartissimavaa.
Erinagissorsuaq Kalaallit Nunaannit annaaneqarmat attortissimavoq.
- Kalaallit ullumikkut annaasarput tassaavoq erinarsornermigut asanninnermik tunisisartoq. Ida Heinrichip ilisarnaataa tassaavoq erinarsornermini asanninnermik annertuumik tunisisarami. Erinarsoraangami taallat misigissusilertarpai, tusarnaartullu misigissutsinik tunisarlugit, Per Rosing oqaluttuarpoq.
Tamanut maligassiuisoq
Ida Heinrich 2016-imi katsorsarneqarsinnaanngitsumik kræftimik napparsimalerpoq, kræftilu timaanut siaruaalluni. Nakorsartikkaluarluni suliaritittaraluarlunilu, taamaattoq operamik erinarsornini unitsivinngilaa. Saqqummersitaa kingulleq tassaavoq ‘Pigaara ilunni assit’ siorna saqqummersoq.
Ida Heinrich piffissami sivisuumi napparsimareerluni ullumi tallimanngornermi nalunaaqutaq 11:35 toquvoq.
Erinarsornermi aqutsisoq, aamma operartartumik suleqateqartarsimasoq, isumaqarpoq Ida Heinrich inuppassuarnut maligassiuisuusoq.
- Maligassiuisuuvoq. Upperilluinnarpara Ida Heinrich pillugu inuusuttorpassuit erinarsornermik nipilersornermillu soqutigisaqalersimasut. Asaneqartorujussuuvoq, qummullu isigineqarluni, Per Rosing oqaluttuarpoq.
Ataqqinaatilik
Per Rosing isumaqarpoq Ida Heinrichip inuusuttorpassuit pitsaasumik isumaqalersissimagai. Taassuma tikkuarpaa Ida Heinrich tusarnaartitsinermini tamatigut tusarnaartuni tiguartarai.
- Ataqqinaatilerujussuuvoq, erinarsornermini misigissutsinik tunisiuarami. Taamaammat operarnerani arlallit tiguartittarput.
- Operamik erinarsortartuusimavoq immikkuullarissoq. Nallerneqarsinnaanngilaq, Per Rosing oqarpoq.