Per Berthelsen Siumumit anivoq

Nakkutilliisunut siunnersuisoqatigiinnut ammasumik allagaqarnerup Per Berthelsen maanna parteeqatigisimasaminut Siumumeersunut ungasillisippaa.

Ane Egede Mathæussen aamma Peter Davidsen, borgmesteri Asii Chemnitz Narup (IA) Siorarsiorfimmi suliniummut tunngasunik eqqunngitsumik paasissutissiisimanersoq, nakkutilliisunit misissorneqarnissaa kajumissaarutigaat.

Allakkamut ammasumut paasitinneqarsimanani uani nittartakkami allaaserisamut oqaaseqaammi Per Berthelsenip erseqqissarpaa.

Atuaruk: Unnerluut: Nuummi borgmesterip kikkut tamaasa uukapaatikkai

Taassuma parteeqatigisimasani allagaqarnerminni paasititseqqaarsimannginnerarpai, tamannalu kamaammissutigaa, ingammik Siorarsiorfimmut suliniummut isumaqatiginninniarnermi nammineq peqataanerarami.

- Gruppimi arlaleriarluta ataatsimiinnerit kingorna suliniut tamakkiisumik tapersinnginnerani annerusumik uanga oqaaseqartinneqartuuvunga, isornartorsiuisunillu amerlasuunik apeqquteqartuullunga, Per Berthelsen allaaserisamut oqaaseqarnermini allappoq.

Kommunimut qinersinerup kingorna politikkimit tunuarniarluni Per Berthelsenip siornatigut nalunaarutigereerpaa, kisianni maanna partiimi ingerlaannaq atuutilertumik tunuarpoq.

- Uanga taamatut tatiginanngitsuuneq akuerinianngilara, taamaammallu maanna Siumumit ullumikkut tunuarpunga, tassa marsip 31-annut utaqqeqqaarnanga.

Kommunalbestyrelsip isumaqatigiittut suliniut tapersersimagaa taassuma naqissuserpaa. Siumut taassuma maanna mumisitsisutut pasillerpaa.

- Ilaasortat uanga taasisukka ilaatinnagit, uanga ilisimatinnanga imminut pitsaanersiorlutik isummaminnik allanngortitsisut aamma suliniummut uanga nammineq ataqqinassutsinnut ''sallunaveeqqutitut'' inissitannik nuanninngitsumik saqqummiussinneq narrujuummissutigaara.

Per Berthelsenip oqaaseqaataa tamaat allaaserisap uuma ataani atuarsinnaavat Unnerluut: Nuummi borgmesterip kikkut tamaasa uukapaatikkai