Peqqussut: Tasiilami meeqqat pillugit suliat misissorneqarnerat maanna nakkutigineqalissapput

Tasiilami meeqqat pillugit sulianik isumaginninnikkut misissuineq kinguaattoorfioqaaq. Kommuneqarfik Sermersooq ajornartorsiummik aaqqiinissamut qaammatinik sisamanik periarfissinneqarsimavoq

Tasiilami meeqqat pillugit sulianik isumaginninnikkut misissuinissaq ukioq ataaseq sinnerlugu ingerlanneqarsimanngilaq. Isumaginninnermut Naalakkersuisoqarfimmi nakkutilliisuutitat ukioq manna maajip juunillu qaammataanni nalunaaqqaaratik nakkutilliiartorsimanerisa tamanna takutippaa. Tamatuma malitsigisaanik Kommuneqarfik Sermersooq peqquneqarsimavoq, misissugassaminik taakkunannga aaqqeeqqullugu.

Nalinginnaasumik isumaginninnikkut misissuisoqartarpoq meeraq pillugu nalunaaruteqarneq suliamik aallartitsinissamut tunngavissiigaangat, soorlu assersuutigalugu angerlarsimaffiup avataanut inissiinissaq pisariaqarpat.

Suliassat 200-t

2018-imi apriilip qaammataaniit ukioq manna maajip qaammataata tungaanut isumaginninnikkut misissupallanneqartussat taamaallaat aqqanillit isumagineqarsimapput, suliassat 201-it suliassat utaqqitinneqartut allattorsimaffiannut ilanngunneqarsimallutik. Inatsit malillugu misissuinerit taakku qaammatit marluk ingerlaneranni isumagineqartussaapput. Suliassanulli 189-inut tunngatillugu qaammatit marluk sinnerlugit qaangiuppoq kommunip nalunaarutinut tunngatillugu pigaartuata aalajangermagu, isumaginninnikkut misissuinissaq pisariaqartoq. Suliassat pisoqaanerpaat ukioq ataaseq sinnerlugu pisoqaassuseqarput

Qaammatit sisamat qaangiuppata aaqqiissuteqartoqassaaq

Nakkutilliisartut tamanna tunngavigalugu aggustusip 14-iani Kommuneqarfik Sermersooq peqqusimavaat, isumaginninnikkut misissugassat qaammatit sisamat ingerlaneranni isumageqqullugit. Peqqussummi allassimavoq:

Kommunalbestyrelsi § 45 naapertorlgu isumaginninnikkut misissorneqartussatut 2019-imi maajip aallaqqaataa sioqqullugu aalajangikkanik aallartitsissasoq. Peqquneqarnermiit qaammatip ataatsip ingerlanerani misissuinissaq pilersaarusiorneqassaaq, tamatumalu kingorna kingusinnerpaamik qaammatit pingasut qaangiuppata misissuineq naammassineqarsimassaaq. Suliassat sivisunerpaamik uninngatinneqarsimasut siulliullugit naammassineqassapput.

Malittarisassaliortoqassaaq isumaginninnikkut misissugassat inatsit atuuttoq naapertorlugu ingerlaavartumik aallartinneqartarnissaannik naammassineqartarnissaannilu qulakkeerinnittussamik.

Isumaginninnikkut misissuisarnerni pineqartuni, misissuinerit naammassineqaraangata kingusinnerpaamik qaammatit marluk qaangiukkaangata, misissuisimaneq tunngavigalugu iliuusissatut pilersaarusiortoqartassaaq.

Ikiuinerup iluaqutaanngeratarsinnaanera

Nakkutilliisartut nalunaarusiaminni misissuisarnerit taakkua pingaaruteqassusaat erseqqissaatigaat, tassa meeqqamut ikiuutissaq eqqortoq nassaariniarnerani taamungaannaq sulisoqarsinnammat.

- Kommuni misissueqqaarani iliuuseqarnermini, iliuusissat ajornartorsiutinut meeqqap atugarliorneranut pissutaasut siunnerfiginagit suliarisoorsinnaavai. Ilaannikkooriarluni ikiorsiissut meqqap inissisimneranut sunniuteqanngitsoorsinnaavoq, taamalu kommuni sunniuteqanngitsumik iliuuserisanut isumalluutinik atuilussinnarluni.

Kommuneqarfik Sermersuumi Meeqqanut Ilaqutariinnullu Ingerlatsviup suliniutissat arlallit, peqqussutip naammassineqarnissaanut qulakkeerinnittussat aallartissimavai. Tamanna Meeqqanut Ilaqutariinnullu Ataatsimiititamut inassuteqaammi takuneqarsinnaavoq.

Meeqqanut Ilaqutariinnullu Ingerlatsivimmi pisortap, Marta Lund Olsenip siusinnerusukkut Sermitsiaq.AG-mut nassuerutiginikuuaa, Tasiilami isumaginninnikkut misissuiniartarnerit annertuumik ajornartorsiutaasartut.

Powered by Labrador CMS