Peqqussut: Høgeh-Damip angallataa piaarnerpaamik qaqeqquneqartoq
Angallat ningittagarsuut, Narluneq, ilaatigut Kim Høegh-Damimit pigineqartoq avatangiisinut oqartussanit ernumanartoqartinneqarpoq, oqartussat Iluliaq Seafood peqqusimavaat, angallammik piaarnerpaamik qaqitseqqullugu
Avatangiisinut oqartussanit ernumassutigineqarpoq, angallatip umiiarnikup, Narluneq, uuliakuulersinnaanera, taamaalissappammi imaani uumassusilinnut tamanna ajorluinnartumik kingunerlutsitsisinnaagami.
Angallat arfinngornermi septembarip 14-iani unnukkut kinnguvoq, Iluliaq Seafoodillu angallatip avatangiisinut ulorianartorsiortitsiunnaarnissaa pillugu angallatip qanoq ililluni nunamukaallugu kalinneqarsinnaaneranut pilersaarusioqqullugu, Avatangiisinut Naalakkersuisoqarfiup peqqusimavaa.
Qaqitsinissamut pilersaarut
- Imaani avatangiisinut tunngatillugu inatsit toqqammavigalugu ningittagarsuutip qaqinneqarnissaa peqqussutigisimavarput. Ingerlatseqatigiiffiup imaani avatangiisit mingutsinneqarsinnaanerat pinngitsoortinniarlugu, isumannaatsumik illersorneqarsinnaasumillu qaqitsinissamut pilersaarutmmik tunniussinissaa piffissalerneqarsimavoq, Naalakkersuisoqarfimmi pisortaq, Mette Skarregaard Pedersen Sermitsiaq.AG-mut ilisimatitsivoq.
Piffissaq qaqitsinngiffiusoq sivitsoriartortillugu anorersualersinnaanera uuliakoornermik kinguneqarsinnaasoq aarlerinarsiartussaaq.
Uulia siammarnaveerlugu, angallat kaajallallugu puttasuliisoqarsimavoq
Angallammit diselimik kuuttoqalaarpoq. Taamaammat avatangiisimut oqartussat “pølsi” 125 meterisut takissusilik uulia dieselilu siammarnaveerlugit, angallat kaajallallugu inississimavaat.
Upalungaarsimasut pisortaata Peter-Erik Thomsenip siusinnerusukkut Sermitsiaq.AG-mut ilisimatitsissutigisimavaa, angallat dieselimik 30.00 liiterimik, hydraulikoliemik 6000 liiterimik motoorillu uuliaanik 300 liiterimik usisoq.
Akiligassaq
Naalakkersuisoqarfimmi pisotap ilisimatitsissutigaa, angallammut kinngusimasumut tunngatilllgu avatangiisitigut oqartussat aningaasartuutaat Iluliaq Seafood A/S-imit akilerneqassasut.